Southampton sló City úr leik

Pep Guardiola stillti upp sterku liði þrátt fyrir að hafa hvílt Erling Haaland, Kevin De Bruyne og Rodri. Heimamenn í Southampton byrjuðu leikinn af krafti og skoruðu tvö mörk um miðbik fyrri hálfleiksins.

Fyrst skoraði Sekou Mara eftir sendingu frá Lyanco og stuttu síðar kom Moussa Djenepo heimamönnum í 2-0 eftir sendingu Romeo Lavia.

Í hálfleik gerði Guardiola þrefalda breytingu þar sem De Bruyne, Manuel Akanji og Nathan Ake komu inná og auk þess kom Erling Haaland inn stuttu síðar. Þetta hafði ekki mikið að segja. City tókst ekki að skora og Southamton náði að sigla sigrinum í höfn.

Lokatölur 2-0 og þeir verða þá í pottinum þegar dregið verður í undanúrslitin ásamt Manchester United, Newcastle United og svo annað hvort Nottingham Forest eða Wolves en þar er í gangi vítaspyrnukeppni.