Tónlist

Baggalútur og GDRN með nýtt jólalag: „Mátulega passív–agressíf“

Dóra Júlía Agnarsdóttir skrifar
GDRN og Guðmundur Pálsson fluttu jólalagið Myrra á jólatónleikum Baggalúts.
GDRN og Guðmundur Pálsson fluttu jólalagið Myrra á jólatónleikum Baggalúts. Skjáskot/Vísir

Hljómsveitin Baggalútur og söngkonan GDRN voru að senda frá sér tónlistarmyndband við splunkunýtt lag sem þau frumfluttu á jólatónleikum Baggalúts í ár. Lagið ber heitið Myrra en blaðamaður heyrði í Braga Valdimar og fékk að heyra nánar frá.

Myndbandið má sjá í spilaranum hér að neðan.

Klippa: Myrra - Baggalútur & GDRN

Aðventutregi

„Þegar Guðrún samþykkti að vera gestur hjá okkur fórum við að velta fyrir okkur hvað hún ætti að syngja. Það var gefið að hún myndi taka „Jólin eru okkar“, en við vildum endilega bæta við öðru lagi með henni,“ segir Bragi Valdimar. Það varð úr að hann samdi þetta lag fyrir hana.

„Sem hún sem betur fer samþykkti að syngja! Þetta er með dálítið melankólískum texta um skammdegið og smá aðventutrega. Einhvern veginn er myrran einmitt táknið um það, aukapakkinn til jesúbarnsins, sem fær kannski ekki mestu athyglina hjá viðtakandanum. Guðrún gerir þetta auðvitað snilldarvel og ekki skemmir sópransaxinn hjá Óskari Guðjóns fyrir.“

GDRN var meðal leynigesta á jólatónleikum Baggalúts í ár. Tékkneski listamaðurinn Krištof Kintera hannaði sviðið.Spessi

Fremur fúl í desember

Hér má finna textann við lagið Myrra, fyrir þau sem elska að syngja með.

Þau koma bara einu sinni á ári. Ótrúlega vinsæl, miðað við. 

Með öllu sínu óhófi og fári — um allan heim. Ég held samt alveg helling upp á þau — og heilmikið með þeim. 

Þau flæða yfir menn og málleysingja, mátulega passív–agressíf. 

Þegar trítilóðar kirkjubjöllur hringja — heims um ból þá er endanlega óumflýjanlegt það eru… jól — enn á ný. 

Ég hefði nú reyndar mátt búast við því. Jól — eins og í fyrra. 

Veröldin er reykelsi og gull. En ég er myrra. Ég hefði átt að elska þig í júlí í öllu falli meðan það var bjart. 

En í staðinn er ég hér — fremur fúl í desember. Og horfi upp á hamingjusöm flón sem halda…. jól — enn á ný.

Ég hefði nú getað gert ráð fyrir því. Jól — eins og í fyrra. Veröldin er reykelsi og gull. En ég er myrra. Veröldin er reykelsi og gull. En ég er myrra.

Baggalútur ásamt góðum gestum í lok tónleikanna.Spessi

Lag og texti: Bragi Valdimar Skúlason. GDRN, söngur. Guðmundur Pálsson, söngur. Sigurður Guðmundsson, raddir. Kristinn Snær Agnarsson, trommur. Helgi Svavar Helgason, slagverk. Guðmundur Pétursson, gítar. Valdimar Kolbeinn Sigurjónsson, bassi. Chris Carmichael, strengir. Óskar Guðjónsson, saxófónn. Tómas Jónsson, píanó og orgel.

Tekið upp í Háskólabíói í desember 2022. Hljóðupptökur: Friðjón Jónsson. Hljóðblöndun og hljómjöfnun: Friðjón Jónsson og Guðmundur Kristinn Jónsson. Stjórn hljóðupptöku: Guðmundur Kristinn Jónsson. Stjórn myndupptöku: Helgi Jóhannesson. Klipping og litgreining: Guðmundur Kristinn Jónsson. Myndataka: Hlynur Hólm Hauksson, Sturla Holm Skúlason, Jón Víðir Hauksson, Gísli Berg, Vilhjálmur Siggeirsson


Tengdar fréttir

Baggalútur afhjúpar samstarf við frægan erlendan listamann

Ástsæla og sívinsæla sveitin Baggalútur var að senda frá sér myndband af áhugaverðum blaðamannafundi þeirra. Ástæðan er komandi jólatónleikatörn sveitarinnar og samstarf við tékkneska listamanninn og hönnuðinn Krištof Kintera.. 

„Það er ekki bannað að hafa gaman“

Bagga­lútur harmar mjög ef að sótt­varna­brot voru framin á tón­leikum þeirra í gær eins og lög­reglan greindi frá í dag. Hljóm­sveitin hafi látið al­manna­varnir taka út fyrir­komu­lag viðburðarins í síðustu viku til að passa að allt væri í sam­ræmi við gildandi reglur og eina brotið sem með­limir hljóm­sveitarinnar hafi tekið eftir í gær hafi verið grímu­leysi margra gesta, sem er ef­laust vanda­mál við flesta við­burði í dag.






Fleiri fréttir

Sjá meira


×