Tónlist

Tók sitt fyrsta gigg fyrir ári síðan en hefur nú spilað um allan heim

Dóra Júlía Agnarsdóttir skrifar
Tónlistarkonan Árný Margrét er alin upp á Ísafirði. Hún spilaði fyrsta giggið sitt fyrir ári síðan en hefur nú spilað á tónlistarhátíðum erlendis.
Tónlistarkonan Árný Margrét er alin upp á Ísafirði. Hún spilaði fyrsta giggið sitt fyrir ári síðan en hefur nú spilað á tónlistarhátíðum erlendis. Anna Maggý

Tónlistarkonan Árný Margrét á viðburðaríkt ár að baki sér en hún spilaði sitt fyrsta gigg á Airwaves hátíðinni í fyrra í gegnum streymi. Þá hafði hún einungis gefið út eitt lag en hefur nú sent frá sér plötu í fullri lengd og komið fram bæði hérlendis og erlendis. Blaðamaður tók púlsinn á Árnýju, sem spilar á Iceland Airwaves í ár.

Öðruvísi en áður

Árný segir hátíðina leggjast vel í sig.

„Ég er bara mjög spennt. Ég er að fara að spila með bandi í fyrsta skipti, sem verður öðruvísi en ég hef gert áður. Ég hlakka bara til sjá alla hina tónlistarmennina, finna Airwaves fílinginn og spila auðvitað!“

Innblásturinn kemur úr öllum áttum til þessarar tónlistarkonu og má þar nefna umhverfið, fólk, veðrið, tónlist og textabrot.

„Líka eitthvað sem ég er að fást við á því augnabliki, það getur verið svo ótrúlega margt sem veitir innblástur.“

Byrjaði fyrir ári

Þrátt fyrir að búa að mikilli reynslu hefur Árný ekki verið í bransanum í langan tíma.

„Það er í rauninni bara ár síðan ég byrjaði í þessu öllu saman. Fyrsta giggið var einmitt á Airwaves í fyrra, þá hafði ég bara gefið út eitt lag,“ segir Árný og bætir við:

„Nú hef ég gefið út EP plötu og svo plötu í fullri lengd sem kom út núna í október.“

Árið hefur verið stútfullt af ævintýrum hjá henni en hún hefur verið að spila og ferðast mikið.

„Ég hef komið fram í Evrópu, Kanada og Bandaríkjunum. Ég hef farið í nokkrar tónleikaferðir og hitaði þar á meðal upp fyrir Leif Vollebekk, Blake Mills og Pino Palladino, sem eru tónlistarmenn sem ég hef haldið lengi upp á.

Svo kom ég fram á Newport Folk Festival í júlí, sem er mjög stórt tækifæri svona snemma á ferlinum.“

Sterkari eftir stór tækifæri

„Ég hef lært rosalega margt og þroskast á þessu öllu saman. Líka þar sem ég hef ekki ferðast mikið áður, þá er þetta alveg út fyrir þægindarammann að fara til útlanda og spila fyrir mörg hundruð manns.“

Árný segir þetta búið að vera erfitt og gaman á sama tíma.

„Ég er samt búin að kynnast mér meira, orðin sterkari og farin að þora aðeins meira en áður. Ég er mjög þakklát fyrir öll þessi stóru tækifæri og allt fólkið sem ég er búin að fá að vinna með.“

Aðspurð hvað hún geri til að undirbúa sig rétt fyrir gigg segir Árný Margrét:

„Ég vel mér föt, geri mig til, raula lögin eitthvað aðeins með gítarinn og reyni að ná einbeitingu. En ég held að ég hafi enga heilaga rútínu, bara að stilla gítarinn kannski og tússa upp settlista.

En eftir gigg þá fæ ég mér eitthvað gott, einhvern góðan mat eða snarl, fer í sturtu og hef það kósý. Það er orðin svolítil hefð.“

Árný spilar í Fríkirkjunni laugardagskvöldið 5. nóvember. Það er margt fleira á döfinni hjá henni en hún er farin að huga að útgáfutónleikum í tengslum við nýju plötuna.

„Svo eru nokkur festivöl erlendis eftir áramót og eitthvað annað í bland, þar til meira kemur í ljós!“


Tengdar fréttir

Árný Margrét frumsýnir tónlistarmyndband: Myrkur og vel valin augnablik

Rísandi stjarnan Árný Margrét frumsýnir tónlistarmyndband við lagið The world is between us hér á Lífinu á Vísi. Myndbandinu er leikstýrt af Erlendi Sveinssyni en það er tekið á 16 millimetra filmu og eyddi tökuhópurinn fimm dögum fyrir vestan á Ísafirði, heimabæ Árnýjar, að skjóta það.

Iceland Airwaves birtir fyrstu staðfestu tónlistaratriði hátíðarinnar

Tónlistarhátíðin Iceland Airwaves staðfesti í dag að hátíðin fari fram í ár, þriðja til fimmta nóvember næstkomandi. Samhliða því voru fyrstu fjórtán böndin sem koma fram tilkynnt ásamt ýmsum spennandi nýjungum, þar sem listamönnum og viðburðarhöldurum býðst meðal annars að halda sína eigin viðburði.

Bjóða upp á dagpassa á Airwaves í ár

Iceland Airwaves er handan við hornið og enn bætast við íslenskar stórstjörnur. Í dag var tilkynnt að Vök, Bríet, The Vintage Caravan, Systur, Júníus Meyvant, Emmsjé Gauta og Atla Örvarsson munu koma fram. Úkraínsku Eurovisionfararnir Go_A, finnski raf- og harmónikku músíkantinn Antti Paalanen og palenstínski Grammy verðlaunahafinn Arooj Aftab verða einnig á hátíðinni.






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.