„Míuverðlaunin eru verðlaun til að heiðra þá sem koma að þjónustu langveikra barna á einn eða annan hátt. Einhver sem hefur hjálpað eða stutt við þig og þína fjölskyldu á erfiðum tíma. Það sem þeim finnst vera „bara vinnan sín“ getur skipt sköpum fyrir aðstandendur langveikra barna og börnin sjálf. Hægt er að tilnefna heilbrigðisstarfsmann í hvaða starfsstétt sem er, hvar á landinu sem er,“ segir í tilkynningu um verðlaunin.

24 heilbrigðisstarfsmenn voru tilnefndir í ár. Valnefnd Míuverðlaunanna valdi svo topp 10 hópinn sem mættur var á Spritz Venue nú í kvöld. Hópurinn var heiðraður á fallegum viðburði sem haldin var af Mia Magic, sem er góðgerðarfélagið sem stendur á bakvið þessi fallegu og einstöku verðlaun. Epal eru aðalstyrktaraðilar verðlaunanna í ár og leyndi það sér ekki að viðburðurinn var einstaklega fallegur. Patricia Arjona, innanhússarkitekt, stíliseraði viðburðinn.

Mikið þakklæti lá í loftinu á viðburðinum. Tryggvi Helgason, barnalæknir á Barnaspítala Hringsins og Domus Medica, hlaut Míuverðlaunin að þessu sinni.

Brynja Dan, athafnakona, afhenti Míuverðlaunin ásamt Ingu Elínu einni virtustu handverkskonu evrópu, sem hannaði verðlaunagripinn. Skúlptúrinn, prýðir fallega orðið “hugrekki” sem hefur verið einkennisorð Mia Magic og er tekið úr fyrstu bókinni, Mía fær lyfjabrunn.

Sérfræðingur í offitu barna

„Tryggvi ákvað aðeins sex ára gamall að hann ætlaði að mennta sig sem læknir, en hann er af þriðju kynslóð lækna í beinan karllegg. Afi hans var fyrsti prófessor Íslands í barnalækningum. Faðir Tryggva starfaði sem geðlæknir en áhugi hans lá í svefnrannsóknum og síðar þróun á svefnmælitækjum,“ kom fram í ræðu um Tryggva á viðburðinum.

„Tryggvi stundaði nám við Menntaskólann í Hamrahlið, þaðan lá leið hans í læknadeild Háskóla Íslands. Tryggvi lét þó erfitt háskólanám ekki duga því eins og hann segir sjálfur: Meðan ég var í læknisfræðinni var ég í tvö ár í Söngskóla Reykjavíkur. Eftir kandidatsárið tók ég mér svo árs frí frá dagvinnu, vann á vöktum en kláraði 7. og 8. stig í klassískum söng! Tryggvi hélt síðan út til Rotterdam í Hollandi þar sem sérnám í barnalækningum varð fyrir valinu.“

Í Rotterdam starfaði Tryggvi sem barnalæknir á Sophia barnaspítalanum þangað til hann flutti aftur heim til Íslands árið 2007. Hann hóf störf hjá Domus Medica og árið 2011 byrjaði hann að starfa á barnaspítala Hringsins og starfar Tryggvi í dag á báðum stöðum.

„Tryggvi stofnaði Heilsuskólann sem er starfræktur á göngudeild barnaspítala Hringsins. Áhugi hans á offitu barna kviknaði þegar hann var í Rotterdam í sérnámi og hefur hann síðan þá verið helsti sérfræðingur okkar hér á landi í þeim málaflokki.“

Alltaf tilbúinn að hlusta

Í umsögnum foreldranna sem tilnefndu Tryggva má sjá að hann hefur einstakt lag á að hlusta. 

„Tryggvi er alltaf til taks sama hvað. Við eigum barn með flókið tilfelli af sjúkdóm sem erfitt er að greina ásamt öðrum sjúkdóm sem er mjög sjaldgæfur. Læknar erlendis hafa skoðað hans sjúkrasögu og hafa ekki treyst sér að gefa nein ráð hingað til. Þegar okkar læknar sem sjá um mál barnsins eru vant við látnir er Tryggvi einn af þeim læknum sem þorir að taka ákvarðanir. hann hlustar á mig/móður barnsins og spyr mig til dæmis hvað ég haldi að málið sé áður en að hann skoðar barnið.“

„Oft hef ég rétt fyrir mér en ekki alltaf en hann er alltaf tilbúinn að hlusta, kynnast okkur sem fjölskyldu og það allra mikilvægasta er að hann spyr hvernig okkur líður andlega lika.“

Hættir ekki fyrr en hann finnur lausn

„Tryggvi er falinn gimsteinn barnalæknanna. Við leitum til hans einnig þó um veikindi sé ekki að ræða. Við förum stundum og ræðum bara málin og ræðum hversu mikilvægt það er til dæmis að hugsa vel um sál og líkama, sofa vel, næra sig vel og hreyfa sig. Þetta er alls ekki nógu mikið rætt við foreldra og börn sem lifa við langveikindi. Það hefur mikil áhrif á börnin að fá pepp í þessum málum líka og er Tryggvi alltaf tilbúinn í að hitta okkur fyrir það.“

„Tryggvi er okkar "go to" læknir þegar okkar læknir sem stjórnar meðferð og öðru er ekki við og biður okkar læknir okkur einmitt um að fara til Tryggva þegar hann getur ekki hitt á okkur ef hann er til dæmi erlendis eða í fríi. Svo það er gott samstarf á milli okkar allra sem er mjög dýrmætt.“

„Tryggvi er hreinn og beinn og það sem mér þykir mest vænt um er þegar hann segir bara hreint út: ég veit það ekki, ég þarf að hringja i vin. Tryggvi á skilið Míuverðlaunin þvi hann er læknir sem hugar að allri fjölskyldunni, hlustar og hættir ekki fyrr en hann finnur viðeigandi lausn eða aðila sem getur fundið þessa lausn.“

Gefa hjartað í starfið

Míuverðlaunin eru hluti af félagi sem ber nafnið Mia Magic og er stofnað af Þórunni Evu G. Pálsdóttur eftir að hún gaf út bókina Mía fær Lyfjabrunn. Fríða Björk Arnardóttir kom svo inn í verkefnið og bjuggu þær stöllur til Míuverðlaunin. Þau voru afhent í fyrsta skipti í apríl á þessu ári eins og fjallað var um hér á Vísi.

„Innsti kjarni heilbrigðisstarfsfólks sem sinnir langveikum börnum mætti á viðburðinn. Hópurinn sinnir þessum börnum af einskærri alúð og gefa þau öll sem eitt allt hjarta sitt til starfsins eins og fram kom í ræðum kvöldsins,“ segir í tikynningunni um verðlaunin.