Fótbolti

Giggs segir það síðasta sem hann myndi vilja gera væri að meiða Kate and­lega eða líkam­lega

Runólfur Trausti Þórhallsson skrifar
Ryan Gigga sést hér á leið í dómsal ásamt verjendateymi sínu á sjötta degi réttarhaldanna í gær. Reiknað er með því að réttarhöldin muni standa yfir í 10 daga.
Ryan Gigga sést hér á leið í dómsal ásamt verjendateymi sínu á sjötta degi réttarhaldanna í gær. Reiknað er með því að réttarhöldin muni standa yfir í 10 daga. Christopher Furlong/Getty Images

Í gær, þriðjudag, fór sjöundi dagur réttarhaldanna yfir Ryan Giggs, fyrrverandi leikmanni Manchester United og landsliðsþjálfara Wales, fram. Hann er ásakaður um að hafa beitt þáverandi kærustu sína, Kate Greville, andlegu og líkamlegu ofbeldi þau þrjú ár sem þau voru saman. Þá er hann sakaður um að hafa gefið Emmu Greville, systur Kate, olnbogaskot.

Hinn 48 ára gamli Giggs er ásakaður um að ráðast á tvær konu, Kate og Emmu. Ásamt því að beita Kate andlegu og líkamlegu ofbeldi á þeim tíma er þau voru saman þá á hann að ahfa hent henni nakinni út af hótelherbergi og sýnt af sér stjórnandi hegðun nær allan tímann er samband þeirra stóð. Giggs, sem er sigursælasti leikmaður í sögu Manchester Untied, hefur ávallt neitað sök og sagt að um ýkjur og lygar sé að ræða. Hann bar vitni í gær.

Leikmaðurinn fyrrverandi viðurkenndi að hafa haldið framhjá Kate er hann var spurður út í það af eigin lögfræðiteymi. Hann sagðist eiga erfitt með að standast freistingar og að hann hefði haldið framhjá í öllum þeim samböndum sem hann hefði verið á lífsleiðinni. Eins og frægt er orðið hélt Giggs við konu bróður síns um árabil.

Giggs tók hins vegar fram að hann hefði aldrei ráðist á Kate né aðrar konur sem hann hefði verið með í gegnum árin. Hann viðurkenndi að það hefði átt sér stað einhverskonar „ryskingar“ eða „stimpingar“ (e. tussle, tangle, scuffle). 

Það var hins vegar því að Kate réðst á hann, öfugt við það sem hún og systur hennar segja. Þá rákust höfuð þeirra óvart saman en Giggs sagðist ekki hafa skallað Kate viljandi.

„Ég gæti hafa rekist í Kate og systur hennar í stimpingunum (e. scuffle) en það var aldrei vilji minn að meiða aðra hvora.“

Í vitnisburði Kate og Emmu hafði komið í ljós að Kate ætlaði að fara frá Giggs eftir að upp komst um framhjáhöld hans. Hann sagðist ekki hafa vitað af því og hann trúði því að þau ættu framtíð saman. Þau voru að skipuleggja kaup á nýju húsi og að stofna fjölskyldu. Hann trúði því að þau gætu fundið lausn á vandamálum sínum, meira að segja eftir að hann var handtekinn.

Getur ekki sætt sig við ásakanir Kate og Emmu

Giggs sagðist sjá eftir rifrildinu og að það hafi farið úr böndunum. Hann gæti hins vegar ekki með nokkru móti skilið eða samþykkt ásakanirnar gegn sér. Þá bætti hann við að það væri Kate sem sýndi af sér stjórnandi hegðun, sérstaklega þegar hún væri undir áhrifum áfengis.

„Flest atvikanna áttu sér stað eftir að Kate drakk of mikið. Hún verður mjög öfundsjúk þegar hún er drukkin og viðurkennir að hafa reynt að espa mig upp til að fá viðbrögð frá mér. Þrátt fyrir það þá myndi ég aldrei bregðast við með ofbeldi.“

Þá sagði leikmaðurinn fyrrverandi að Kate hafði skipað honum að senda skilaboð á konur sem hún hélt að hann væri að halda við. Vildi hún fá staðfestingu frá þeim hvort eitthvað hefði gerst milli þeirra og Giggs.

Segir fráleitt að hann hafi reynt að kúga Kate

Giggs hafði áður verið ásakaður um að reyna kúga Kate með því að hóta að senda kynferðisleg myndbönd af Kate á samstarfsfélaga hennar. Hann segir það fráleitt.

„Ég væri dauðhræddur við þá fjölmiðlaumfjöllun sem myndi fylgja slíku atviki. Kate veit hvað mér finnst um fjölmiðla og neikvæða umfjöllun.“

Varðandi tölvupóst sem Giggs sendi Kate - sem var titlaður „kúgun“ - þá sagði hann að um hefði verið að ræða myndband af Kate að dansa við lagið Last Christmas með Wham. Kate sagðist hafa eytt tölvupóstinum án þess að horfa á myndbandið.

„Þetta var grín milli mín og Kate.“

Giggs lýsti Kate, sem er meira en áratug yngri en hann, sem þroskaðri og sjálfstæðri konu. Hann sagði að hann hefði alltaf hvatt hana í öllu sem hún tók sér fyrir hendur og að hann væri stoltur af afrekum hennar.

Þá sagði Giggs að sú lýsing sem hann hefði heyrt á sambandi þeirra undanfarna daga væri gjörólík skilningi hans á sambandinu. Hann sagði að sambandið hefði verið frábært en vissulega hefðu þau rifist einstaka sinnum eins og gerist í öllum langtíma samböndum.

„Ég viðurkenni að sambandið var ekki fullkomið en að byggðist að mestu á ást og umhyggju.“

Um atvikið þann 20. nóvember

Þann 20. nóvember áttu sér stað stimpingar á heimili Giggs sem enduðu með því að höfuð hans og Kate rákust saman. Þá rakst olnbogi hans í andlit systur hennar, Emmu. Það var þetta kvöld sem lögreglan var kölluð til og handtók Giggs. Hann tjáði sig um þetta örlagaríka kvöld í vitnisburði sínum.

Er lögreglan tók skýrslu af Giggs sagði leikmaðurinn fyrrverandi að hann og Kate hefðu ætlað að gista á hóteli í miðbæ Manchester-borgar. Eftir að hafa rifist þá fór Kate heim, Giggs tekur fyrir að hafa vitað að hún ætlaði að fara frá honum sama kvöld. Hann var því eðlilega ekki í góðu skapi er hann komst að því. 

Svo áttu sér stað stimpingar, sem Giggs segir að Kate hafi átt upptökin að. Eftir það hafi Giggs ákveðið að fara út úr húsinu til að koma í veg fyrir frekari átök. Hann fór til nágranna síns og bað hana um að hringja á lögregluna, hún gerði það ekki en bauðst til að gefa Giggs síma til að hringja úr.

Þegar hann sneri aftur til baka þá brutust út frekari stimpingar. Hann viðurkenndi að höfuð þeirra hefðu rekist saman en það var alls ekki viljandi.

„Ég gerði enga tilraun til að slá Kate á neinum tímapunkti. Í bæði skiptin var ráðist á mig. Það síðasta sem ég myndi vilja væri að meiða hana (Kate), andlega eða líkamlega.“

Réttarhöldin halda áfram á morgun. Þar mun Giggs svara fleiri spurningum.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.