Tónlist

Halda orkustiginu í hæstu hæðum

Dóra Júlía Agnarsdóttir skrifar
Stuðkabandið er myndað af miklum stemningsmönnum sem koma fram á Þjóðhátíð í ár.
Stuðkabandið er myndað af miklum stemningsmönnum sem koma fram á Þjóðhátíð í ár. Aðsend

Hljómsveitin Stuðlabandið er þaulvön að koma fram og halda uppi stemningu en Stuðlabandið hefur spilað á stærstu útihátíðum Íslands undanfarin ár.

Þjóðhátíð 2022 fer fram með pompi og prakt í Heimaey í lok júlí í ár. Fjölbreytt flóra íslensks tónlistarfólks mun stíga á svið og skemmta gestum en hátíðin er nú haldin í fyrsta skipti frá árinu 2019. Lífið á Vísi tekur hér púlsinn á tónlistarfólkinu og fær nánari innsýn í atriðið þeirra á Þjóðhátíð.

Hvenær fóruð þið fyrst á Þjóðhátíð?

Stuðlabandið kom fyrst fram á Þjóðhátíð árið 2016. Það var ótrúlega eftirminnileg hátíð fyrir okkur þar sem við lokuðum hátíðinni á sunnudagskvöldinu (aðfaranótt mánudags). 

Við höfum svo verið partur af þessari mögnuðu hátíð allar götur síðan og erum stoltir af því og þakklátir Eyjamönnum fyrir það traust sem þeir hafa sýnt okkur síðan 2016.

Hvað finnst ykkur skemmtilegast við þessa hátíð?

Það er auðvitað alltaf ótrúlega gott að heimsækja Vestmannaeyinga sem eru miklir höfðingjar heim að sækja. Herjólfsdalur er svo magnaður staður og orkan sem kemur frá svæðinu og fólkinu sem sækir hátíðina er algjörlega mögnuð. 

Ég leyfi mér að fullyrða að þessa orku finnur maður eingöngu í Herjólfsdal um verslunarmannahelgina.

Við hverju mega hátíðargestir búast þegar þið stígið á svið?

Þeir sem þekkja okkur vita að vissu leyti við hverju má búast frá okkur. Við verðum auðvitað einkar glæsilega til faranna eins og okkar er von og vísa og við verðum í gríðarlega miklu stuði eins og alltaf. Við komum til með að bregða okkur í allra kvikinda líki, halda orkustiginu í hæstu hæðum og spila lög sem allir þekkja og flestir elska.

Hvað er uppáhalds Þjóðhátíðarlagið ykkar?

Það ku vera lagið Þar sem hjartað slær eftir Halldór Gunnar Pálsson með texta eftir Magnús Þór Sigmundsson. Lagið er auðvitað algjörlega ódauðlegt í mögnuðum flutningi Sverris Bergmann.

Hvernig ætlið þið að undirbúa ykkur fyrir stóru stundina?

Við verðum eins og flestar verslunarmannahelgar á miklu flugi víðsvegar um landið og felst undirbúningurinn að mestu um hvíld og næringu á milli stríða.

Við byrjum helgina á Selfossi á Unglingalandsmóti og brunum svo á Flúðir og skemmtun þar út nóttina. 

Því næst förum við til Vestmannaeyja og sláum botn í helgina með öllum gestum Þjóðhátíðarinnar. Maggi söngvari startar því með Brekkusöng og við tökum svo góða þrjá tíma a ballinu eftir miðnætti.

Við erum svo vanir því að taka upphitunarhring eins og íþróttalíð gerir fyrir mikilvæga kappleiki til að kýla okkur í gang fyrir kvöldið. 

Svo er auðvitað góð regla hjá okkur að sleppa áfengisneyslu fyrir gigg til að hámarka gæði framkomunnar.

Tengdar fréttir

„Gleymdum vissulega öllu þegar við mættum á svið“

Hljómsveitin Sprite Zero Klan skaust upp á stjörnuhimininn árið 2017 með laginu Tíkin Mín. Þeir eiga að baki sér ófá öflug danslög og þar á meðal nokkur lög sem eru tileinkuð Þjóðhátíð en Sprite Zero Klan verður einmitt í dalnum í ár.






Fleiri fréttir

Sjá meira


×