Veður

Allt að átján stiga hiti í dag

Tryggvi Páll Tryggvason skrifar
Við Laugarvatn.
Við Laugarvatn. Vísir/Vilhelm.

Veðrinu verður nokkuð misskipt í dag, ef marka má veðurspá. Spáð er svölu verði fyrir norðan en allt að átján stiga hita sunnan heiða.

Reikna má með að norðlæg átt ráði ríkjum í dag. Það þýðir svalt veður fyrir norðan með rigningu eða súld. Sunnan heiða verður hins vegar víða bjart með köflum, hiti upp í átján stig.

Útlit er þó fyrir skýjað veður og vætu austur af Öræfum og líkur á síðdegisskúrum á Suðurlandi.

Á morgun, sjómannadag, stefnir í hægan vind víðast hvar og dregur úr vætunni um allt land. Úrkomulítið eftir hádegi, en áfram útlit fyrir stöku síðdegisskúrum á Suðurlandi.

Staðan á hádegi.Veðurstofan

Það byrjar að rigna suðvestantil seint annað kvöld, en framundan er vætusöm vika um sunnanvert landið, að því er segir í hugleiðingum veðurfræðings á vef Veðurstofu Íslands.

Veðurhorfur á landinu

Norðlæg átt 3-10 m/s og víða rigning eða súld um landið norðan- og austanvert, en bjart með köflum annars staðar og líkur á stöku síðdegisskúrum syðst. Þykknar upp með lítilsháttar vætu suðvestanlands undir kvöld. Hiti 5 til 10 stig fyrir norðan, en upp í 18 stig sunnantil að deginum.

Breytileg átt 3-8 m/s á morgun og úrkomulítið eftir hádegi. Byrjar að rigna suðvestantil seint annað kvöld. Hiti breytist lítið.

Veðurhorfur á landinu næstu daga

Á sunnudag (sjómannadagurinn):

Norðlæg átt 3-10 m/s um landið norðanvert, rigning eða súld og hiti 4 til 9 stig. Vestlæg átt 3-10 sunnantil, en strekkingur syðst. Víða skýjað með köflum og stöku skúrir. Hiti 11 til 18 stig. Úrkomulítið um allt land undir kvöld.

Á mánudag:

Sunnan og suðaustan 5-10 m/s og rigning, en skýjað og þurrt norðaustantil. Hiti 7 til 15 stig, hlýjast á Norðausturlandi.

Á þriðjudag:

Suðlæg átt 5-13 m/s og rigning eða skúrir. Úrkomulítið fyrir norðan og léttir þar til seinnipartinn. Hiti 8 til 16 stig, hlýjast norðaustantil.

Á miðvikudag og fimmtudag:

Suðlæg átt og vætusamt, en þurrt að mestu norðaustantil. Hægt kólnandi.

Á föstudag (lýðveldisdagurinn):

Útlit fyrir norðvestlæga átt og stöku skúri á víð og dreif. Kólnar lítillega fyrir norðan.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×