Út­skýrði myndina undar­legu sem hann birti eftir sigurinn gegn Leeds

Maguire hefur líkt og aðrir leikmenn Man United fengið töluverða gagnrýndi á sig að undanförnu. Þá hefur mikið verið rætt og ritað um fyrirliðaband Man United en Maguire ber það í dag.

Ofan á allt sem hefur gengið á hjá félaginu þá hafði það ekki skorað mark eftir fast leikatriði fyrr en kom að leik helgarinnar. Maguire stangaði þá hornspyrnu Luke Shaw í netið og fagnaði vel og innilega.

Eftir leik birti hann mynd af því er hann renndi sér á hnjánum á rennandi blautu grasinu á Elland Road fyrir framan stuðningsfólk Leeds United. Ef vel var að gáð mátti þó sjá að átt hafði verið við myndina.

Mikil umræða skapaðist á samfélagsmiðlum og velti fólk fyrir sér hvaða ástæðu Maguire hefði fyrir því að birta mynd sem hefði augljóslega verið átt við. Hann útskýrði það á endanum í dag.

„Til allra sem eru að spyrja, þetta er góður vinur minn og mikill stuðningsmaður Leeds United. Hann var á vellinum en ekki í myndinni. Hann hefur verið að skjóta á okkur alla vikuna svo mér datt í hug að bæta honum við á myndina,“ sagði Maguire á Twitter-síðu sinni í dag.

Sigur Manchester United á Leeds United þýðir að liðið er nú með 46 stig í 4. sæti ensku úrvalsdeildarinnar, fjórum stigum minna en Chelsea sem situr í 3. sætinu með leik til góða.