Innlent

Aldrei fleiri greinst með COVID-19 fyrir norðan

Margrét Helga Erlingsdóttir skrifar
Helsta áskorunin sem blasir við á Sjúkrahúsinu á Akureyri er mannekla að mati forstjórans.
Helsta áskorunin sem blasir við á Sjúkrahúsinu á Akureyri er mannekla að mati forstjórans.

Metfjöldi smita blasir nú við á Norðurlandi eystra en í gær greindust 375 með COVID-19. Gríðarlegt álag hefur verið á greiningardeild og sýnatökufólki sem nálgast hámarksafkastagetu.

 Hildigunnur Svavarsdóttir, forstjóri sjúkrahússins á Akureyri, segir að staðan með tilliti til sjúkdómsins sé ekki góð.

„Fjöldi smita er náttúrulega gríðarlegur og ég held við eigum metið hér á þessu svæði sem auðvitað ekki eftirsóknarvert. Þetta hefur náttúrulega farið mjög vaxandi undanfarið á svæðinu en þó erum við ekki með vaxandi fjölda inniliggjandi. Eins og staðan er núna er einn inniliggjandi á sjúkrahúsinu [vegna COVID-19].“

Hildigunnur segir að stærsta áskorunin séu fjarvistir starfsfólks vegna sjúkdómsins.

„Það er stóra vandamálið hjá okkur. Þetta hefur verið á bilinu 40-50 manns sem hafa verði úti á hverjum tíma, ýmist í einangrun eða sóttkví þannig að manneklan er náttúrulega okkar stærsta áskorun eins og hjá mörgum öðrum heilbrigðisstofnunum og það er bara eitthvað sem við þurfum að taka stöðuna með á hverjum degi.“

Veit ekki hvaða þýðingu toppurinn hefur fyrir framhaldið

Staðan á sjúkrahúsum úti á landi er hluti af hættumati sóttvarnalæknis. Hildigunnur varð spurð hvernig henni litist á blikuna.

„Það er voðalega erfitt að segja til um það. Þetta er svo óljóst. Maður hefði haldið að með þessari gríðarlegu aukningu smita yrði meira um innlagnir en það kemur ekki í ljós fyrr en seinna þannig að við vitum ekki hvað þessi toppur þýðir. Þýðir hann að við munum fá fleiri innlagnir eða ekki? Þetta er stanslaus áskorun og við erum alltaf í viðbragðsstöðu.“

Stofnunin hefur aukið viðbragð sitt í ljósi fjölginar smita og opnað COVID-göngudeild til að sinna sjúklingum í gegnum hana til þess að auka líkurnar á að ekki verði þörf fyrir innlögn.

„Það hafa verið fleiri komur en á undanförnum vikum og það má ábyggilega rekja til þennan aukna fjölda smita.“

Afléttingar handan við hornið

Heilbrigðisráðherra hefur tilkynnt um að á föstudaginn muni hann að öllum líkindum tilkynna um verulegar afléttingar á sóttvarnaaðgerðum. Hvernig lýst þér á afléttingar?

„Mér líst í sjálfu sér bæði vel og illa á þetta. Mér líst illa á þetta þegar ég horfi á þetta út frá því hvað við getum misst mikið af fólki. Sjúkrahúsin eru með strangari takmarkanir en samfélagið og við getum haldið því svolítið áfram til að koma í veg fyrir að smit berist inn á stofnunina en það er okkar helsta markmið. Hins vegar þá erum við með gríðarlega góðar sóttvarnir og það hefur sýnt sig í því að í gegnum tíðina höfum við ekki verið að fá smit með starfsfólki því við framfylgjum mjög góðum sóttvörnum og munum halda því áfram þrátt fyrir afléttingar. Við munum alltaf vera með einhverjar takmarkanir en á vissan hátt get ég tekið undir það að ég held að það sé kominn tími til að aflétta. Við verðum bara að vega það og meta hér inn á spítalanum hversu hratt við getum farið í afléttingar innan veggja spítalans.“

Nálgast hámarksafkastagetu greiningardeildar

Hildigunnur segir að viðbragð starfsfólksins lýkist smurðri vél en engu að síður sé það orðið langþreytt á að vera í sífelldri viðbragðsstöðu. Gríðarlegt álag sé einnig á greiningardeildinni sem greindi í gær um fjórtán hundruð sýni sem nálgast hámarksafkastagetu.

„Það hefur svo sannarlega sýnt sig í gegnum þetta hvað þetta skiptir miklu máli að við getum verið að greina þessi PCR sýni hér og getum tekið líka við yfirflæði frá nærsamfélaginu og jafnvel frá höfuðborgarsvæðinu ef því er að skipta. […] En eins og staðan er núna getum við í rauninni ekki tekið við meiru því í gær skilst mér að það hafi verið 14.00 sýni á svæðinu og hámarksgeta okkar er 1800 sýni og þá erum við að leggja allt undir og vinna hér langt fram á kvöld.“

Hildigunnur segist ekki geta neitt annað en að hrósa starfsfólkinu sem hefur staðið vaktina í gegnum mikla álagstíma. „Það hefur gengið ótrúlega vel við þessar erfiðu aðstæður en auðvitað er farið að sjá mikla þreytu í okkar mannskap eins og annars staðar og það er í sjálfu sér ekkert nýtt. En við verðum bara að vera meðvituð um það að þetta er mikið álag á heilbrigðisstarfsfólk að vera alltaf í viðbragðsstöðu.“


Tengdar fréttir



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.