EM-hlaðvarp Seinni bylgjunnar: Mjög raunhæft að mótið verði flautað af

Ingvi Þór Sæmundsson skrifar 21. janúar 2022 09:01

Guðmundur Guðmundsson hefur gagnrýnt sóttvarnir á hóteli Íslands. getty/Jure Erzen

Ásgeir Örn Hallgrímsson og Róbert Gunnarsson taka undir gagnrýni Guðmundar Guðmundssonar og leikmanna íslenska landsliðsins á sóttvarnir á EM í handbolta og segja aðstæður óviðunandi.

Sex lykilmenn Íslands smituðust af kórónuveirunni í aðdraganda leiksins gegn heimsmeisturum Danmerkur í gær. Fleiri lið hafa lent illa í veirunni, ekki síst það þýska en á annan tug leikmanna þess eru smitaðir.

Þeir Ásgeir Örn og Róbert ræddu um leikinn gegn Dönum og stöðuna sem komin er upp hjá íslenska liðinu í EM-hlaðvarpi Seinni bylgjunnar sem Stefán Árni Pálsson stýrir.

„Þetta voru algjörir lykilmenn sem duttu út, allt menn með hlutverk, þannig að útlitið var mjög svart og setur mótið í uppnám hjá okkur. Við vitum ekkert hvort eða hvenær þeir koma til baka,“ sagði Róbert.

„Ég er sammála með aðbúnaðinn. Hann er til háborinnar skammar og gjörsamlega óþolandi. Skoðum aðeins tímalínuna. Strákarnir byrja á að fara í búbblu hérna heima, eru frá fjölskyldu og vinum á Íslandi og passa sig eins og þeir geta. Svo mæta þeir út og í einhvern sirkus. Eru með grímulausum túristum í lyftu og barinn opinn. Þetta er hræðilegt. Maður hefði viljað sjá þá á sér hóteli eða í sér álmu. Við höfum upplifað það áður að liðin séu saman á hóteli og engir aðrir gestir. Árið 2022 í miðju covid að það sé ekki betur staðið að þessu er eins og Guðmundur myndi segja: katastrófa.“

Ásgeir Örn tók í sama streng. „Þeir skýla sér á bak við það að fulltrúar frá öllum samböndunum hafi komið og tekið þetta út í desember eða eitthvað og það komu engar athugasemdir. En staðan er allt önnur í dag. Þjóðverjar eru með tólf smit, við sex. Þetta átti sér einhvern aðdraganda og hefur verið kraumandi og mallandi undir í einhvern tíma. Þá gerirðu bara einhverjar ráðstafanir, ferð með liðin af þessu hóteli og kemur þeim fyrir á minna hóteli þar sem sóttvarnir eru fullnægjandi.“

Ásgeir Örn segir óljóst hvað gerist í framhaldinu, hvort Evrópumótið verði hreinlega klárað.

„Það er bara mjög raunhæft að mótið verði flautað af því annar hver maður er smitaður og liðin lömuð. Þá verður mótið ómarktækt,“ sagði Ásgeir Örn.

Hlusta má á EM-hlaðvarp Seinni bylgjunnar í spilaranum hér fyrir ofan.

EM karla í handbolta 2022

Tengdar fréttir

Skýrsla Henrys: Risahjarta í þessum drengjum

Eftir allt sem á undan var gengið áttu líklega margir von á því að íslenska liðið yrði eins og lömb leidd til slátrunar gegn Dönum í kvöld. Það varð alls ekki raunin.

20. janúar 2022 23:00

„Við erum flottur hópur og mér fannst við bara komast nokkuð vel frá þessu í dag“

Daníel Þór Ingason átti fína innkomu inn í íslenska landsliðið þegar bregðast þurfti við sex kórónuveirusmittilfellum í landsliðshópnum á EM, fyrir leikinn við Danmörku í kvöld.

20. janúar 2022 22:55

Ómar Ingi: Trúðum því í alvörunni að við myndum vinna

Ómar Ingi Magnússon var eðlilega svekktur með tap íslenska landsliðsins gegn Danmörku í fyrsta leik milliriðilsins á EM í kvöld. Hann segir að það hafi verið erfitt fyrir hópinn að koma sér í gang fyrir leikinn en að liðið hafi haft raunverulega trú á því að vinna heimsmeistarana í kvöld.

20. janúar 2022 22:42

„Ósanngjarnt að við lendum í þessu“

„Þetta er búin að vera rússíbanareið og eiginlega sjokk. Vonbrigði. Þó að það sé ekki hægt að segja slíkt þá finnst manni líka ósanngjarnt að við lendum í þessu,“ segir Guðmundur Guðmundsson landsliðsþjálfari um síðastliðinn sólarhring og smitin sex sem greinst hafa í hans leikmannahópi.

20. janúar 2022 22:37

Elvar: Alls konar tilfinningar í allan dag

Elvar Ásgeirsson fékk heldur betur eldskírn í dag þegar hann spilaði sinn fyrsta A-landsleik í handbolta, gegn sjálfum heimsmeisturum Danmerkur á EM, og komst vel frá sínu.

20. janúar 2022 22:16

Einkunnir á móti Danmörku: Ómar Ingi bestur en margir kjúklingar stóðust prófið

Margi reynslulitlir leikmenn fengu mikla ábyrgð á móti Dönum í kvöld og flestir þeirra voru að spila fleiri mínútur en þeir höfðu gert í fyrstu þremur leikjunum samanlagt. Forföll lykilmanna breyttu mjög miklu fyrir Ísland á þessu EM en frammistaðan sýndi að öll von er ekki úti enn.

20. janúar 2022 22:00