Tölfræðin á móti Danmörku: Sex opnuðu markareikning sinn á þessu Evrópumóti

Íslenska karlalandsliðið í handbolta tapaði með fjórum mörkum á móti Dönum, 24-28, í fyrsta leik sínum í milliriðli á Evrópumeistaramótinu 2022 í Ungverjalandi og Slóvakíu.

Það vantaði auðvitað marga lykilmenn í íslenska liðið og tveir af byrjunarliðsmönnum Íslands höfðu ekki spilað sekúndu á mótinu og annar þeirra, Elvar Ásgeirsson, hafði aldrei spilað landsleik.

Sex leikmenn íslenska liðsins skoruðu sitt fyrsta mark á þessu Evrópumóti en það voru þeir Janus Daði Smárason (4 mörk), Elvar Ásgeirsson (3 mörk), Arnar Freyr Arnarsson (2), Teitur Örn Einarsson (2), Orri Freyr Þorkelsson (2) og Daníel Þór Ingason (1).

Margir voru hræddir við það að Niklas Landin myndi fara illa með reynslulitla leikmenn en það var aftur á móti varamaður hans, Kevin Möller, sem varði 17 skot og 59 prósent skotanna sem komu á hann.

Mathias Gidsel fór líka illa með íslensku vörnina en hann skoraði níu mörk, gaf 7 stoðsendingar og fiskaði fimm víti.

Vísir fylgist vel með tölfræði íslenska liðsins á mótinu og hefur nú tekið saman þá leikmenn sem sköruðu fram úr í tölunum í þessum fjórða leik Íslands á mótinu.

Hér fyrir neðan má sjá toppa íslenska liðsins í tölfræðinni.