Hinn 46 ára gamli Sascha Lense, „heilasérfræðingur“ eins og Rangnick kallar hann, hefur áður unnið með Rangnick hjá Schalke og RB Leipzig. Lense var sjálfur leikmaður á sínum tíma og lék í næstefstu deild Þýskalands.

Lense er ætlað að hjálpa til við hugarþjálfun leikmanna United sem Rangnick er sannfærður um að þörf sé fyrir.

„Fyrir mér er þetta algjörlega borðleggjandi. Þetta snýst ekki um að koma leikmönnum á rauða sófann og halda í hönd þeirra. Ef að maður er með sérþjálfara fyrir markvörslu, sóknarleik, líkamsrækt og þolþjálfun, þá ætti maður að vera með heilasérfræðing líka,“ sagði Rangnick.

„Á síðustu árum hafa flest félög í Þýskalandi ráðið íþróttasálfræðing. Ég var með Hans-Dieter Hermann, núverandi íþróttasálfræðing þýska landsliðsins, með mér hjá Ulm árið 1998. Það var líklega fyrsta félagið sem gerði þetta,“ sagði Rangnick.

„Þetta snýst um að sýna leikmönnum hvernig heilinn getur hjálpað líkamanum, og að hann vinni ekki gegn honum. Þegar við ræðum um fótbolta þá vitum við að meirihlutinn snýst um heilann – hvað er maður að hugsa? Hvernig greinir maður aðstæðurnar?

Leikmennirnir, þjálfarateymið og allir sem tilheyra liðinu okkur ættu að hugsa með réttum hætti,“ segir Rangnick sem vill að Lense verði sýnilegur á æfingasvæðinu og taki virkan þátt.

Rangnick hefur einnig fengið Chris Armas, fyrrverandi stjóra New York Red Bulls og FC Toronto, inn í þjálfarateymi sitt.

Áhrifa þeirra Lense og Armas verður þó ekki farið að gæta í kvöld þegar United tekur á móti Young Boys í lokaumferð riðlakeppni Meistaradeildar Evrópu, enda bíða þeir báðir eftir atvinnuleyfi.