Veður

Reikna með hviðum allt að 45 metrum á sekúndu

Atli Ísleifsson skrifar
Úr Öræfasveit á Suðausturlandi. Mögulegt er að gulu viðvörunum verði breytt í appelsínugular þegar líður á daginn.
Úr Öræfasveit á Suðausturlandi. Mögulegt er að gulu viðvörunum verði breytt í appelsínugular þegar líður á daginn. Vísir/Vilhelm

Það gengur í norðvestanhvassviðri eða -storm austan Öræfa og á sunnanverðum Austfjörðum í kvöld, og hafa verið gefnar út gular viðvaranir vegna þessa fyrir bæði Austfirði og Suðausturland. Má búast má við mjög snörpum vindhviðum, yfir 45 metrum á sekúndu, á stöku stað á Suðausturlandi.

Í hugleiðingum veðurfræðings á vef Veðurstofunnar segir að reikna megi með ákveðinni vestlægri átt á landinu með rigningu eða slyddu öðru hvoru, en smá snjókomu NA-lands. Hlýnandi veður í bili.

„Norðlægari eftir hádegi með éljum á Norður- og Austurlandi, en léttir annars til og kólnar. Lítilsháttar lægð norður af landinu, hreyfist til suðausturs og dýpkar ört síðar í dag, en það veldur því vaxandi norðanátt á austurhelmingnum nær stormstyrk eða roki á Suðausturlandi undir miðnætti.

Gular viðvaranir hafa verið gefnar út fyrir Austfirði og Suðausturland.Veðurstofan

Vakin er athygli á gulum veðurviðvörunum á suðaustanverðu landinu, sem taka gildi í kvöld, en þar sem hvessir áfram í nótt gætu viðvaranirnar því orðið appelsínugular.

Dregur talsvert úr vindi eftir hádegi á morgun, en þá falla jafnfram viðvarnir úr gildi. Hiti fer einnig ört lækkandi og má reikna með talsverðu frosti seinni partinn.“

Gulu viðvaranir taka gildi fyrir Suðausturland klukkan 20 í kvöld og gilda til klukkan 13 á morgun, en fyrir Austfirði tekur viðvörunin gildi klukkan 21 og gildir til klukkan níu í fyrramálið.

Spákortið fyrir klukkan 15.Veðurstofan

Veðurhorfur á landinu næstu daga

Á föstudag:

Norðvestan 13-20 m/s austantil fram eftir degi, auk þess él á Norðausturlandi, en annars norðlæg eða breytileg átt, 3-10 og bjart með köflum. Frost yfirleitt 2 til 10 stig, kaldast inn til landsins.

Á laugardag:

Suðlæg eða breytileg átt, 3-8 m/s, skýjað með köflum, en vestan 5-10 og slydda eða snjókoma SV-til. Frost 1 til 9 stig, en hlánar við S- og V-ströndina og rigning þar undir kvöld.

Á sunnudag:

Suðaustan og austanáttir með rigningu eða slyddu og hita kringum frostmark, en snjókomu og vægu frosti á Norðaustur- og Austurlandi.

Á mánudag:

Norðlæg átt með éljum á N- og A-lands, en annars bjart og kólnandi veður.

Á þriðjudag:

Útlit fyrir vaxandi austanátt með snjókomu og skafrenningi, en úrkomulítið NA-lands. Hlýnandi heldur í bili.

Á miðvikudag (fullveldisdagurinn):

Líklega hægir vindar með éljum á víð og dreif og fremur kalt í veðri.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.