Erlent

Austurríkismenn horfa fram á útgöngubann fyrir óbólusetta

Hólmfríður Gísladóttir skrifar
Austurríkismenn fögnuðu ákaft þegar aðgerðum var aflétt í vor en nú eru dagar víns og rósa liðnir í bili.
Austurríkismenn fögnuðu ákaft þegar aðgerðum var aflétt í vor en nú eru dagar víns og rósa liðnir í bili. epa/Christian Bruna

Yfirvöld í Austurríki eru sögð örfáum dögum frá því að koma á útgöngubanni fyrir óbólusetta. Metfjöldi greindist með Covid-19 í landinu á síðustu 24 klukkustundum, eða 11.975.

Í Efra Austurríki hyggjast yfirvöld koma á útgöngubanni á mánudag ef stjórnvöld landsins leggja blessun sína yfir fyrirætlanirnar. Þá stendur einnig til að grípa til aðgerða í Salzburg.

Kanslarinn Alexander Schallenberg hefur sagt að útgöngubann fyrir óbólusetta á landsvísu sé líklega óumflýjanlegt. Tveir þriðjuhlutar fólks ættu ekki að þjást vegna afstöðu annarra til bólusetninga.

Hlutfall bólusettra er hvergi lægra en í Efra Austurríki. Þar búa 1,5 milljónir manna og nýgreindir hvergi fleiri.

Óbólusettum er þegar meinað um aðgengi að veitingastöðum, kvikmyndahúsum, hárgreiðslustofum og skíðalyftum. Ef af útgöngubanni verður mun þeim ekki verða heimilt að yfirgefa heimili sín nema til að sækja vinnu, versla í matinn og stunda hreyfingu.

Gagnrýnendur bannsins segja meðal annars að það verði ómögulegt að framfylgja því.

BBC greindi frá.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.