Þessar fréttir koma eflaust fáum á óvart enda var búist við því að nýir eigendur Newcastle myndu skipta um stjóra. Í yfirlýsingu frá Newcastle kemur fram að Bruce og forráðamenn Newcastle hafi komist að sameiginlegri niðurstöðu um að hann myndi hætta hjá félaginu.
#NUFC can confirm that Steve Bruce has left his position as head coach by mutual consent.
— Newcastle United FC (@NUFC) October 20, 2021
The club would like to place on record its gratitude to Steve for his contribution and wishes him well for the future.
Bruce stýrði Newcastle í síðasta sinn á sunnudaginn þegar liðið tapaði, 2-3, fyrir Tottenham á heimavelli. Það var jafnframt þúsundasti leikur hans á stjóraferlinum.
Bruce tók við Newcastle sumarið 2019 og stýrði liðinu í rúm tvö ár. Newcastle endaði í 13. sæti ensku úrvalsdeildarinnar á fyrsta tímabili Bruce við stjórnvölinn. Á síðasta tímabili enduðu Newcastle-menn í 12. sæti.
Newcastle hefur ekki enn unnið leik á þessu tímabili og er með þrjú stig í nítjánda og næstneðsta sæti ensku úrvalsdeildarinnar.
Greame Jones tekur við Newcastle til bráðabirgða og stýrir liðinu gegn Crystal Palace á laugardaginn.
Fjölmargir hafa verið orðaðir við stjórastarfið hjá Newcastle að undanförnu. Má þar meðal annars nefna Steven Gerrard, Lucien Favre, Paulo Fonseca, Brendan Rodgers og Eddie Howe.
