Lífið

„Ég var orðin þannig að ég gat ekki lyft bolla“

Sylvía Rut Sigfúsdóttir skrifar
Sigríður Pétursdóttir kvikmyndafræðingur segist hafa læknað sig af liðagigt með breyttu mataræði.
Sigríður Pétursdóttir kvikmyndafræðingur segist hafa læknað sig af liðagigt með breyttu mataræði. Ísland í dag

„Ég var venjulega mikill orkubolti og svo allt í einu fór að draga mjög af mér. Ég bólgnaði alveg rosalega upp og það fór að flakka bólga á milli liða, á höndunum, í hnjánum, allt í einu út um allt.“

Sigríður Pétursdóttir kvikmyndafræðingur var orðin svo slæm af liðagigt að hún gat illa klætt sig sjálf og suma daga gat hún varla gengið og hún var með stöðuga verki. Lyfin virkuðu ekki sem skyldi og hún ákvað því að taka málin í sínar hendur og lækna sig sjálf. 

Hún breytti alveg um mataræði og tók út fullt af þeim fæðutegundum sem hún var vön að borða. Í dag er hún lyfjalaus og verkjalaus og hamingjusöm og glöð. Vala Matt fór fyrir Ísland í dag og hitti þessa kjarnakonu og fékk að heyra ótrúlega reynslusögu hennar.

„Ég var orðin þannig að ég gat ekki lyft bolla, ekki rétt úr fingrunum og ekki kreppt þá heldur. Ég átti bara erfitt með allt. Ég átti erfitt með að klæða mig og suma daga átti ég erfitt með gang. Þá varð ég að sætta mig við að það væri eitthvað mikið að.“

Leið strax betur

Sigríður bjó í London á þessum tíma og var þar greind með liðagigt. Henni var sagt að þetta væri alvarlegur sjúkdómur og hún var svo sett á sterk lyf sem eru líka notuð við krabbameini. Sigríður segir að það hafi verið sér til happs að fara á námskeið hjá Hildi M. Jónsdóttir.

„Hún hafði sjálf læknað sig af mörgum sjúkdómum á löngum tíma.“

Sjá einnig: Var komin með sjálfsvígshugsanir og fannst hún byrði á fjölskyldunni 

Sigríður segir að eftir að hún fór á netnámskeið Hildar hafi hún tekið út allt glútein, allan sykur, kaffi, kjöt, mjólkurvörur og fleira.

„Ég fann það strax að meltingin var öðruvísi og mér leið strax betur þó að þetta væri erfitt,“ viðurkennir Sigríður.

Sjálfsagt að gefa til baka

„Ég hef alltaf verið mikill sælkeri og svo er ég gift kokki sem eldar besta mat í heimi. Ég var þannig að ég byrjaði daginn á að hugsa um mat og ég endaði daginn á að hugsa um mat.“

Hún fór því að prófa sig áfram í eldhúsinu því hún vildi ekki hætta að borða góðan mat þó að hún hefði gjörbreytt mataræðinu. Nú deilir hún uppskriftum sínum með öðrum í gegnum síðuna sína Sæluréttir Siggu. Það var henni mikilvægt að uppskriftirnar væru öllum aðgengilegar og að fólk þyrfti ekki að borga fyrir þær.

„Mér er svo mikið í mun að allir geti haft aðgang að þessu því það eru svo margir í minni stöðu, sem eru veikir eða eru öryrkjar og hafa ekki mikið á milli handanna, að þeir geti notað uppskriftirnar mínar. Mér finnst svo sjálfsagt að gefa til baka því að ég er búin að fá þessa bættu heilsu og mér líður svo vel.“

Hún hefur nú verið án lyfjanna í um tvö ár og segir að orkan sé miklu meiri. Viðtalið má sjá í heild sinni í spilaranum hér fyrir neðan.


Tengdar fréttir

Var komin með sjálfsvígshugsanir og fannst hún byrði á fjölskyldunni

Hildur Jónsdóttir þjáðist í áratugi vegna verkja og vanlíðanar tengdum sjálfsónæmissjúkdómum og öðrum krónískum kvillum, sem bæði voru meðfæddir og áunnir. Hildur var orðin öryrki og nálægt því að gefast upp, en ákvað að reyna að bæta lífsgæðin með breyttu mataræði og náði þannig ótrúlegum árangri.






Fleiri fréttir

Sjá meira


×