Halda ráðstefnu um heilsu kvenna af erlendum uppruna á Íslandi

Heilsa kvenna af erlendum uppruna á Íslandi hefur ekki hlotið ítarlega umfjöllun í samfélaginu en á tímum COVID-19 kemur enn frekar í ljós að þörf er á frekari umræðu og rannsóknum á þessu sviði. Meðal umræðuefna er reynsla kvenna af erlendum uppruna af heilbrigðiskerfinu, aðgengi og menningarnæmni innan þess ásamt geðheilsu, kynheilsu og frelsis. 

Á dagskrá eru erindi fagaðila um þessi viðfangsefni og pallborðsumræður þar sem konum af erlendum uppruna verður veittur vettvangur til þess að raddir og sögur þeirra heyrist. Ráðstefnan fer fram á íslensku og ensku og verður túlkuð yfir á pólsku og ensku. Dagskrá og nánari upplýsingar um ráðstefnuna má finna á vefsíðu samtakanna.

Félagasamtökin hlutu styrk úr Jafnréttissjóði Íslands fyrir ráðstefnuna, sem haldin verður í Borgarleikhúsinu 2. október. Forsetafrúin Eliza Reid mun ávarpa gesti í upphafi ráðstefnunnar, en sem kona af erlendum uppruna sjálf hefur forsetafrúin sýnt verkefninu stuðning síðustu ár. 

Mæta áskorunum í íslensku samfélagi

Á meðal þátttakenda eru Najmo Fiyasko, sómalísk kvenréttindakona sem upplifði nauðungarhjónaband og limlestingu á kynfærum kvenna (FGM) sem barn. Najmo rekur nú góðgerðarstarf sem heitir MID SHOW, félagasamtök sem starfa nú á Íslandi og í Sómalíu. 

Alma Belem Serrato, sálfræðingur sem er fædd og uppalin í Mexíkó, mun flytja erindið Sálræn vanlíðan meðal kvenna af erlendum uppruna, en Alma sérhæfir sig í að sinna innflytjendum og flóttafólki. Einnig mun ljósmóðirin og doktorsneminn, Edythe Mangindin frá Bandaríkjunum, flytja erindið Menningarleg auðmýkt innan heilbrigðiskerfisins þar sem hún mun fjalla um hugtakið menningarlega auðmýkt og hvernig menning hefur áhrif á heilsu. 

Hennar rödd eru félagasamtök sem starfa með það að markmiði að auka vitund meðal almennings á stöðu kvenna af erlendum uppruna í íslensku samfélagi. Tilgangur félagsins er að stuðla að vitundarvakningu og fræðslu um málefni kvenna af erlendum uppruna á Íslandi, þar með talið áskoranirnar sem þessi hópur mætir ásamt framlagi þeirra til samfélagsins. Markmið félagsins er að auka skilning og meðvitund í garð kvenna af erlendum uppruna í íslensku samfélagi. 

Vekja athygli á stöðu þessarra kvenna

Stofnendur félagasamtakanna Hennar rödd eru Chanel Björk Sturludóttir og Elínborg Kolbeinsdóttir. Innblástur verkefnisins kom frá Letetia B. Jonsson, móður Chanel, en hún er af jamaískum og breskum uppruna og bjó hér á landi fyrir um það bil tíu árum síðan. 

„Letetia tók virkan þátt í samfélagi kvenna af erlendum uppruna á Íslandi og kynntist mörgum frambærilegum konum sem upplifðu sömu hindranir og hún hvað varðar aðlögun að menningu og tungumáli landsins. Sem dóttir Letetia upplifði Chanel ýmsar hindranir sem standa í vegi fyrir konum af erlendum uppruna í gegnum móður sína,“ segir í tilkynningu um viðburðinn. 

„Þessir erfiðleikar lituðu reynsluheim Chanel sem blandaður Íslendingur og hvatti hana til þess að takast á við þennan málaflokk. Eftir samræður við vinkonu sína, Elínborgu Kolbeinsdóttur, sem er menntuð í félagsfræði og mannréttindum, ákváðu þær að sameina krafta sína og stofna samtök með því að markmiði að vekja athygli á stöðu kvenna af erlendum uppruna í íslensku samfélagi. Með jafnrétti að leiðarljósi vilja stofnendur samtakanna nota forréttindastöðu sína og skapa vettvang fyrir konur af erlendum uppruna til þess að deila með samfélaginu veruleika þeirra og greina frá málefnum sem þarfnast úrbóta og verða íslensku samfélagi öllu til hagsbóta. Með því að nýta þekkingu og reynslu svo stórs hóps betur í samfélaginu skilar það þeim og fjölskyldum þeirra aukinni hagsæld - sem skilar sér svo aftur út í samfélagið.“