Enski boltinn

United sækir um undanþágu fyrir Ronaldo

Valur Páll Eiríksson skrifar
Ronaldo er þessa dagana með portúgalska landsliðinu fyrir komandi landsleiki. Hann hittir liðsfélaga sína eftir landsleikjahléið en óvíst er hvaða treyjunúmer hann mun bera.
Ronaldo er þessa dagana með portúgalska landsliðinu fyrir komandi landsleiki. Hann hittir liðsfélaga sína eftir landsleikjahléið en óvíst er hvaða treyjunúmer hann mun bera. Pedro Fiúza/NurPhoto via Getty Images

Enska fótboltafélagið Manchester United hefur sótt um undanþágu til ensku úrvalsdeildarinnar svo stjarnan Cristiano Ronaldo, sem gekk í raðir félagsins í gær, geti borið sína frægu sjöu á bakinu.

Ronaldo bar sjöuna hjá United er hann lék með félaginu milli 2003 og 2009. Hann tók þá við treyjunni af David Beckham sem gekk í raðir Real Madrid á Spáni sama sumar, 2003.

Ronaldo fór sömu leið, til Real Madrid sumarið 2009, og hafa þónokkrir leikmenn borið sjöuna síðan með misgóðum árangri. Antonio Valencia skipti aftur í fyrra númer sitt, 25, eftir að hafa átt slakt tímabil í sjöunni, Ángel Di María hefur leikið betur með öðrum félögum á sínum ferli en á stuttu stoppi sínu í Manchester-borg og sömu sögu er að segja af Hollendingnum Memphis Depay.

Edinson Cavani fékk sjöuna þegar hann gekk í raðir félagsins og hefur gengið betur en þeim flestum sem hafa borið töluna síðustu ár, er hann skoraði 17 mörk á síðustu leiktíð.

United vill taka treyjunúmerið af honum núna en hafði þegar staðfest lista yfir treyjunúmer fyrr í sumar. Ekki má breyta þeim lista nema með því að fá undanþágu hjá ensku úrvalsdeildinni. Breskir fjölmiðlar greina frá því að United hafi sótt um slíka undanþágu og sú sé nú til skoðunar. Slík undanþága hefur ekki verið samþykkt áður.

Gangi það eftir er talið líklegt að Cavani fái treyju númer 21 sem losnaði við skipti Daniels James til Leeds United á lokadegi félagsskiptagluggans í gær. Cavani er jafnan í treyju númer 21 hjá úrúgvæska landsliðinu.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.