Sektað vegna hegðunar stuðnings­fólks síns í leiknum gegn Ís­landi

Ísland og Mexíkó mættust í vináttulandsleik í Bandaríkjunum undir lok maímánaðar áður en íslenska liðið hélt til Færeyja og svo Póllands til að leika tvo leiki til viðbótar.

Stuðningsfólks Mexíkó lét sig ekki vanta á leikinn þó hann væri hinum megin við landamærin og var fjölmennt á leiknum. 

Því miður söng stuðningsfólk „heimamanna“ miður fallega söngva á meðan leik stóð og hefur FIFA nú ákveðið að sekta knattspyrnusamband Mexíkó um 109 þúsund Bandaríkjadali eða rúmlega 13 og hálfa milljón íslenskra króna.

Þetta er ekki í fyrsta skipti sem FIFA sektar Mexíkó og þá hefur landsliðið þurft að leika fyrir luktum dyrum vegna hegðunar stuðningsfólks síns.

Markvörðurinn Rúnar Alex Rúnarsson varð ítrekað fyrir barðinu á níðsöngvum stuðningsfólks Mexíkó í leiknum er hann tók markspyrnur. Þó dómarinn hafi stöðvað leikinn tímabundið þá héldu söngvarnir alltaf áfram.

„Söngvarnir hvetja til mismununar og eru að ýta okkur lengra frá keppnum á vegum FIFA. Fyrir þau ykkar sem finnst skemmtilegt og fyndið að syngja þessa söngva, það er það ekki“ sagði Yon de Luisa, forseti knattspyrnusambands Mexíkó, um málið.

ESPN greindi frá.