Enski boltinn

Framherji Sheffield United réðst á mann sem tók myndband af honum

Ingvi Þór Sæmundsson skrifar
Oliver McBurnie brást illa við þegar hann sá mann mynda sig úti á götu.
Oliver McBurnie brást illa við þegar hann sá mann mynda sig úti á götu. vísir/Simon Stacpoole

Sheffield United rannsakar nú myndband þar sem leikmaður liðsins, Oli McBurnie, ræðst á mann úti á götu.

McBurnie var ósáttur við að maðurinn skyldi taka myndband af sér. Hann réðst að manninum, stappaði á símanum hans og virtist svo kýla hann og sparka í hann.

Í stuttri yfirlýsingu frá Sheffield United segir að félagið hafi verið látið vita af myndbandinu af McBurnie og það sé til rannsóknar.

Þetta er ekki í fyrsta sinn sem McBurnie lendir í vandræðum utan vallar. Hann fékk viðvörun frá enska knattspyrnusambandinu fyrir framkomu sína þegar hann var áhorfandi á leik Swansea City og Cardiff City í fyrra og fyrir tveimur árum var hann tekinn fyrir ölvunarakstur.

McBurnie er meiddur og hefur leikið sinn síðasta leik á þessu tímabili. Hann gerði ekki mikið meðan hann var heill heilsu og skoraði aðeins eitt mark í 25 leikjum fyrir Sheffield United í ensku úrvalsdeildinni. Liðið er á botni hennar og fallið niður í B-deildina.

McBurnie hefur bara skorað sjö mörk í 65 leikjum fyrir Sheffield United síðan hann kom til liðsins frá Swansea fyrir tuttugu milljónir punda 2019.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.