Íslenski boltinn

Lof og last fyrstu um­­­ferðar: Gömlu mennirnir, Leiknir, Pepsi Max, dómarar og margt fleira

Runólfur Trausti Þórhallsson skrifar
Óskar Örn og gömlu mennirnir í Pepsi Max deildinni stálu senunni í fyrstu umferð deildarinnar.
Óskar Örn og gömlu mennirnir í Pepsi Max deildinni stálu senunni í fyrstu umferð deildarinnar. Vísir/Vilhelm

Fyrstu umferð Pepsi Max deildar karla í knattspyrnu lauk í gærkvöld. Það hefur mikið gengið á undanfarna daga og hér að neðan má sjá hvað á skilið lof og hvað á skilið last.

Taka skal fram að þetta er eingöngu skoðun blaðamanns og er aðallega gert til skemmtunar.

Lof

Gömlu mennirnir

Orðatiltækið „Lengi lifir í gömlum glæðum“ á svo sannarlega vel við um fyrstu umferð Pepsi Max deildarinnar. Í nær öllum leikjum umferðarinnar voru það gömlu mennirnir sem stálu fyrirsögnunum.

Óskar Örn Hauksson opnaði markareikning sinn og KR á tímabilinu. Sölvi Geir Ottesen skoraði óvænt fyrir Víking. Matthías Vilhjálmsson skoraði í endurkomu sinni með FH. Hannes Þór Halldórsson hélt hreinu í sigri Íslandsmeistara Vals á ÍA.

Svona mætti lengi halda áfram.

Leiknir Reykjavík

Leiknir Reykjavík er í annað sinn í sögu félagsins í efstu deild. Sumarið 2015 byrjaði liðið á 3-0 sigri á Val en endaði á því að falla. Þó liðið hafi „aðeins“ náð markalausu jafntefli gegn Stjörnunni á laugardaginn þá á liðið skilið hrós.

Guy Smit stóð sig frábærlega í markinu og Brynjar Hlöðversson var frábær í hjarta varnarinnar eftir að hafa lítið sem ekkert náð að spila á undirbúningstímabilinu vegna meiðsla.

Guy Smit átti frábæran leik í markinu hjá Leikni og Brynjar var öflugur í miðverðinum.Vísir/Vilhelm

Stubbur

Steinþór Már Auðunsson, eða einfaldlega Stubbur eins og hann er kallaður dagsdaglega, stóð í marki KA er liðið gerði markalaust jafntefli við HK í Kórnum á laugardag. Steinþór Már var að spila sinn fyrsta leik í efstu deild á ferlinum eftir að hafa getið af sér gott orð með Magna Grenivík, Dalvík/Reyni og Völsung á undanförnum árum.

Steinþór hélt hreinu og bjargaði stigi fyrri KA með frábærri vörslu í síðari hálfleik þegar Stefán Ljubicic slapp einn í gegn eftir slaka sendingu Dusan Brkovic.

KR og Rúnar Kristinsson

Stórleikur umferðarinnar var leikur Breiðabliks og KR á Kópavogsvelli. KR vann leikinn nokkuð sannfærandi 2-0, sjötti sigur KR í röð gegn Blikum í deild og bikar. Rúnar fær svo hrós fyrir að stilla liði sínu hárrétt upp og kaffæra Breiðablik í upphafi leiks.

Last

Breiðablik og Óskar Hrafn Þorvaldsson

Blikum hefur verið spáð góðu gengi í sumar og þó það hafi vantað fjölda leikmanna í gær þá er það engin afsökun. Liðið náði aldrei neinum takti gegn KR og því fór sem fór.

Halldór Árnason og Óskar Hrafn Þorvaldsson, þjálfarateymi Breiðabliks.Vísir/Vilhelm

Óskar Hrafn tók fulla ábyrgð á frammistöðu liðsins er hann ræddi við Vísi eftir leik.

„Ég skrifa þetta bara á stress. Við setjum menn í hlutverk sem þeir eru ekki vanir og ég þarf bara að taka það á mig. Byrjunin var ekki nógu góð, spennustigið var ekki gott og takturinn ekki góður. Á endanum er það auðvitað þjálfarans,“ sagði Óskar Hrafn meðal annars eftir leik.

Framherjar

Aðeins voru sjö mörk skoruð í fyrstu umferð mótsins. Þó skrifa megi margt á slakan sóknarleik og mögulega varnarsinnað upplegg þjálfara liðanna þá fóru framherjar deildarinnar illa með góð færi.

Kristján Flóki Finnbogason fékk mjög gott færi gegn Blikum. Thomas Mikkelsen var svo gott sem ósýnilegur í sama leik. Joey Gibbs fékk eitt ef ekki tvö góð færi í leik Keflavíkur og Víkings og þá brenndi Sævar Atli Magnússon af góðu færi fyrir Leikni Reykjavík.

Pepsi Max-auglýsingin

Aðeins mega 200 manns mæta á leikina og því hafa margir horft á leiki umferðarinnar heima í stofu. Á samfélagsmiðlum mátti sjá að Pepsi Max auglýsing – þessi sem er spiluð rúmlega fimm sinnum í kringum hvern leik – féll ekki í kramið hjá öllum.

Dómarar

Dómarar Pepsi Max-deildarinnar voru full spjaldaglaðir í fyrstu umferð. Alls fóru 34 gul spjöld á loft og þrjú rauð, þar af tvö þegar leikmaður fékk sitt annað gula spjald.

Það var vitað að leikmenn yrðu ryðgaðir í fyrstu umferð eftir Covid-pásu stuttu fyrir mót og leikmenn æstir í að komast út á völlinn. Ef til vill hefðu dómarar landsins mátt kæla spjöldin aðeins og leyfa mönnum að pústa.

Ívar Orri Kristjánsson lyfti gula spjaldinu alls níu sinnum í leik Breiðabliks og KR.Vísir/Vilhelm

Tengdar fréttir




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.