Fótbolti

Karólína með Meistaradeildarmark í fyrsta leik með Bayern

Óskar Ófeigur Jónsson skrifar
Karólína Lea Vilhjálmsdóttir byrjar frábærlega með stórliði Bayern München.
Karólína Lea Vilhjálmsdóttir byrjar frábærlega með stórliði Bayern München. Instagram/@fcbfrauen

Íslenska landsliðskonan Karólína Lea Vilhjálmsdóttir skoraði í sínum fyrsta leik með Bayern München og það í Meistaradeildinni.

Karólína Lea skoraði eitt marka Bayern München í 6-1 útisigri á BIIK Kazygurt frá Kasakstan í fyrri leik liðanna í sextán liða úrslitum Meistaradeildarinnar.

Karólína Lea kom til Bayern frá Breiðabliki í vetur en var þá meidd og hafði ekki spilað með liðinu fyrr en í dag.

Hún kom inn á sem varamaður á 65. mínútu og var búin að skora aðeins þremur mínútum síðar. Karólína Lea kom Bayern þá í 5-0.

Karólína Lea kom inn á fyrir hina þýsku Sydney Lohmann sem byrjaði leikinn hægra megin á þriggja manna miðju í leikkerfinu 4-3-3.

Þetta var fyrsti alvöru fótboltaleikur Karólínu Leu síðan hún spilað með íslenska landsliðinu á móti Svíþjóð í lok október en hún meiddist í framhaldinu og missti af síðustu landsleikjum ársins.

Það er mjög gaman að sjá einn af nýju atvinnumönnunum í íslenska kvennalandsliðinu byrja svona vel og vonandi verður framhald á þessu.

Bayern München er komið með annan fótinn inn í átta liða úrslit keppninnar en þetta var nítjándi sigur liðsins í röð í öllum keppnum.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.