Enski boltinn

„Hann er hrifinn af Manchester United en vill komast til Klopp hjá Liverpool“

Óskar Ófeigur Jónsson skrifar
Kylian Mbappe með Jürgen Klopp fyrir leik Paris Saint-Germain á móti Liverpool á Anfield.
Kylian Mbappe með Jürgen Klopp fyrir leik Paris Saint-Germain á móti Liverpool á Anfield. Getty/Alex Livesey

Orðrómurinn um Kylian Mbappe og Liverpool verður bara sterkari og sterkari en miklar líkur er á því að franski framherjinn yfirgefi Paris Saint Germain í sumar.

Kylian Mbappe er frábær fótboltamaður sem á líka framtíðina fyrir sér í boltanum. Hann er þegar orðinn einn af bestu knattspyrnumönnum heims og á enn átta ár eftir í þrítugsafmælið. Það er því ekkert skrýtið að stærstu félög heims hafi áhuga á honum.

Real Madrid hefur ekki farið leynt með aðdáun sína á Kylian Mbappe og hafa lengi verið í forystunni í kapphlaupinu um hann samkvæmt erlendum fjölmiðlum. Mbappe fór hins vegar á sínum tíma til PSG og nú gæti hann líka farið annað.

Samkvæmt nýjustu vangaveltum í erlendum blöðum þá eru núna taldar mestar líkur á því að hinn 22 ára gamli Kylian Mbappe endi hjá Liverpool.

Blaðamaðurinn Duncan Castles ræddi framtíð Frakkans í hlaðvarpsþættinum Transfer Window Podcast og að Mbappe sé tilbúinn að fara frá PSG í sumar.

„Eins og við höfum sagt frá þá vill hann [Mbappe] komast í aðra af stærstu deildunum til að taka næsta skref á sínum ferli,“ sagði Duncan Castles.

„Ef hann fer í ensku úrvalsdeildinni þá var mér sagt að óskaliðið hans sé Liverpool. Hann er hrifinn af Manchester United sem klúbbi en vill frekar fá að vinna með Klopp hjá Liverpool,“ sagði Castles.

Castles segir að það komi líka til greina hjá Kylian Mbappe að fara til Spánar.

„Þar kemur Barcelona til greina en þar kemur inn í mikil fjárhagsvandræði klúbbsins sem og að Real Madrid er búið að eltast við hann síðan áður en hann fór til PSG,“ sagði Duncan Castles.

Það er ljóst að ef Liverpool ætlar að næla í Kylian Mbappe í sumar þá er eins gott að liðið endi í einu af fjórum efstu sætunum og verði með í Meistaradeildinni á næstu leiktíð. Það er ekki líklegt að maður eins og Mbappe sætti sig við Evrópudeildarfótbolta tímabilið 2021-22.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.