Tónlist

Dans og báns úr MH á toppi PartyZone listans

Hjalti Freyr Ragnarsson skrifar
Hljómsveitin Inspector Spacetime vermir fyrsta sæti PartyZone-listans að þessu sinni.
Hljómsveitin Inspector Spacetime vermir fyrsta sæti PartyZone-listans að þessu sinni.

Nýr PartyZone hlaðvarpsþáttur er kominn á „öldur netvakans“. Fyrsti PartyZone listi ársins, topp 30 fyrir febrúarmánuð, er kynntur og spilaður í þættinum. Árið fer af stað með látum samkvæmt þáttastjórnendum og má finna frábæra nýja tónlist úr heimi danstónlistarinnar í þættinum. Sem fyrr byggir listinn á vali plötusnúðanna og á „nokkuð ígrunduðu grúski þáttarstjórnenda.“

Topplag listans kemur að einhverju leyti á óvart en það er nýútkomið lag með „kornungri og frábærri house sveit úr Menntaskólanum við Hamrahlíð“, Inspector Spacetime. Lagið heitir Dansa og bánsa og segja þáttastjórnendur það yfirgengilega grípandi. „Það væri nú mjög gaman að fá extended mix frá þeim til að spila í þættinum, óskum eftir því hér með,“ segir Helgi Már, einn af PartyZone-mönnum.

„Okkur finnst þetta allveg frábært stöff, strangheiðarleg og pínu naív gleðihústónlist með smá húmor eins og sést í myndbandinu þeirra. Smá Norðurkjallarastemming yfir þeim líka.“

Klippa: Inspector Spacetime - Dansa og bánsa

„Það er nóg að gerast í tónlistinni bæði hér innanlands og erlendis og partýárið mikla 2021 að byrja með stæl þó svo við þurfum að bíða aðeins fram á sumarið eftir að geta dansað af okkur sokkana á dansgólfum bæjarins,“ segir Helgi Már.

Þátturinn hefst á múmíu kvöldsins, en hana eiga Daft Punk, „sem hefur fylgt þættinum eins og skugginn frá þeirra fyrsta lagi.“ Sveitin tilkynnti einmitt í vikunni að hún hefði lagt upp laupana.

„Það er einmitt ein af ófáum dansperlunum þeirra sem er færð til bókar sem múmía kvöldsins. Lag sem gerði allt vitlaust í þættinum og á dansstöðum eins og Rósenberg, Bíókjallaranum (Síbería) og Tunglinu árið 1996.“

Klippa: Party Zone listinn fyrir febrúar

Í þættinum má einnig heyra nýja tónlist frá listamönnum á borð við Booka Shade, Chromatics, Groove Armada, Discloure og Crackazaat, en einnig er ýmislegt íslenskt þar að finna sem sést á topplistanum þennan mánuðinn. Hér að neðan má sjá listann.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.