Enski boltinn

N­evil­le sleppti Bruno er hann fór yfir bestu kaup Man United

Runólfur Trausti Þórhallsson skrifar
Gary Neville og Roy Keane á góðri stundi. Írinn er á blaði sem bestu fimm kaup Man United að mati Neville.
Gary Neville og Roy Keane á góðri stundi. Írinn er á blaði sem bestu fimm kaup Man United að mati Neville. John Peters/Manchester United

Gary Neville, sparkspekingur Sky Sports, vann á sínum tíma fjölda titla með Manchester United. Hann var beðinn um að velja bestu kaup félagsins og hér að neðan má sjá bestu fimm kaupin að mati Neville.

Athygli vekur að hann sleppti Bruno Fernandes, án efa besta leikmanns liðsins í dag og bestu fjárfestu sem Man United hefur gert undanfarin ár.

5. sæti: Nemanja Vidic

Miðvörðurinn frá Serbíu kostaði sjö milljónir punda er hann var keyptur frá Spartak Moskvu árið 2006. Breytti varnarleik liðsins til hins betra og gerði lífið auðveldara fyrir Neville í hægri bakverðinum. Vann fjölda titla og þar á meðal Meistaradeild Evrópu árið 2008.

Nemanja Vidic og Rio Ferdinand mynduðu eitt besta miðvarðarpar í sögu ensku úrvalsdeildarinnar. Aðeins annar komst á listann hjá Neville.Nordic photos/AFP

4. sæti: Wayne Rooney

Núverandi stjóri Derby County í ensku B-deildinni kostaði 27 milljónir punda er hann kom frá Everton árið 2004. Hann átti eftir að borga þann pening margfalt til betra og er sem stendur markahæsti leikmaður í sögu félagsins með 253 mörk, met sem verður möguelga aldrei slegið.

3. sæti: Cristiano Ronaldo

Portúgalska ofurstjarnan kostaði litlar 12 milljónir punda er hann kom frá Sporting í Portúgal sumarið 2003. Það gerði hann þó á sínum tíma að dýrasta táningi í heimi. United seldi hann svo til Real Madrid sem var þá hæsta upphæð sem lið hafði greitt fyrir leikmann. 

Eftir á að hyggja hefði United átt að selja hann á helmingi meira.

Þessir tveir komust báðir á listann hjá Neville. Segja má að myndin lýsi þeim ágætlega.EPA/MAGI HAROUN

2. sæti: Roy Keane

Írinn geðþekki kostaði 3.7 milljónir punda er Sir Alex Ferguson sótti hann til Nottingham Forest árið 1993. Ótrúlegur leikmaður sem var um árabil einn sá harðast í ensku úrvalsdeildinni. 

Ástæðan fyrir velgengni Manchester United og ef ekki hefði verið fyrir slæm mjaðmameiðsli hefði hann enst enn lengur. Skoraði 50 mörk í ensku úrvalsdeildinni, ekki amalegt fyrir mann sem kunni bara að tækla og rífa kjaft að margra mati.

Það voru fáir betri en Cantona á sínum tíma.Mynd/Nordic Photos/Getty

1.sæti: Eric Cantona

Hver annar? Kóngurinn sjálfur kostaði 1.2 milljónir punda þegar honum var svo gott sem stolið af Leeds United árið 1992, þáverandi fjendum Man Utd. Einhver ótrúlegustu kaup allra tíma en Cantona lagði grunninn að ótrúlegri sigurgöngu United með Ferguson við stjórnvölin. 

Hann vann fjóra titla á aðeins fimm árum og var í leikbanni eina tímabilið þar sem titillinn vannst ekki. Einnig vann hann FA-bikarinn tvívegis áður en hann ákvað að kalla þetta gott og leggja skóna á hilluna rétt þrítugur að aldri.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.