Enski boltinn

María orðin leikmaður Man. Utd.

Ingvi Þór Sæmundsson skrifar
María Þórisdóttir í búningi Manchester United.
María Þórisdóttir í búningi Manchester United. getty/Manchester United

Norska landsliðskonan María Þórisdóttir er gengin í raðir Manchester United. Hún skrifaði undir samning við félagið til 2023 með möguleika á eins árs framlengingu.

María kemur til United frá Englandsmeisturum Chelsea sem hún lék með í fjögur ár. Hún varð tvisvar sinnum enskur meistari með Chelsea og einu sinni bikarmeistari.

„Ég er stolt af því að ganga til liðs við Manchester United. Þegar ég var að vaxa úr grasi var félagið alltaf stórt í Noregi og það er mjög spennandi fyrir mig að vera orðinn hluti af liðinu,“ sagði María á heimasíðu United.

María, sem er 27 ára, hefur leikið 46 landsleiki fyrir Noreg og skorað tvö mörk. Hún var í norska liðinu sem komst í undanúrslit á HM 2019.

Chelsea og United eru jöfn að stigum á toppi ensku ofurdeildarinnar en Chelsea á leik til góða. Chelsea sigraði United í toppslag um síðustu helgi, 2-1.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.