Íranskur fjárfestir kaupir helmingshlut í Everton

Everton sendi frá sér tilkynningu í kvöld þar sem tilkynnt var að samþykkt hefði verið tilboð Farhad Moshiri í 49,9% eignarhlut í félaginu.

Moshiri átti ásamt Alisher Usmanov hluta í Arsenal til lengri tíma en hann seldi Usmanov hluta sinn á dögunum. Kemur fram í tilkynningunni að Moshiri hafi lagt fram loforð um að leggja til fé til fjárfestinga næstu árin.

Enska úrvalsdeildin á enn eftir að staðfesta viðskiptin en Everton hefur í tæplega áratug leitað að fjárfestum til að koma að félaginu.

„Ég er mjög sáttur að þetta sé komið á hreint og að ég sé orðinn einn af eigendum þessa sögufræga félags. Bill Kenwright kenndi mér hvað það snýst um að halda með Everton og ég hlakka til samstarfs okkar í framtíðinni.“