„Mesta hneykslið að giskað hafi verið á Sigurð Inga og Guðlaug Þór“

„Ég bara skil ekki hvernig menn gátu klikkað á svona,“ segir Brynjar Níelsson þingmaður um spurningu í síðasta þætti Útsvars þar sem spurt var um hvaða núsitjandi þingmenn hafi spilað leiki í efstu deild í knattspyrnu. Brynjar gleymdist í upptalningunni.

„Það er mynd af Bjarna Benediktssyni og Willum Þór Þórssyni og svo spurt hvaða þingmaður auk þeirra hafi spilað í efstu deild. Rétta svarið var Höskuldur Þórhallsson. Haldið var fram að það væru bara þrír þingmenn, en það er bara alls ekkert svo,“ segir Brynjar léttur í bragði í samtali við Vísi.

Brynjar segist ekki hafa séð Útsvarið sjálfur en að Willum hafi komið til hans í dag og sagt að hann mundi ekki betur en að Brynjar hafi spilað í efstu deild. „Í Útsvari er alla vega ekki gert ráð fyrir því.“

Brynjar segist þó ekki hafa tekið þessu persónulega. „En að giska á Sigurð Inga og Guðlaug Þór. Það fannst mér langmesta hneykslið. Að vísu var Guðlaugur þokkalegur í knattspyrnu en hann var bara svo grófur að það var ekki hægt að vera með hann í liðinu.“

Aðspurður um knattspyrnuferil sinn segist Brynjar meðal annars náð að spila unglingalandsleik. „Ég hætti í knattspyrnu sem unglingur en svo var ég dreginn á æfingar 1981, 82 og spilaði þá nokkra leiki í efstu deild með Val þangað til ég tognaði í nára og hætti endanlega.“

Hvað hefði getað orðið Brynjar?

„Spurðu Þorgrím Þráinsson. Hann segir að ég hefði getað orðið besti knattspyrnumaður Íslands. En svo byrjaði ég reyndar aftur og spilaði þá með Fylki árið 1984. Þá spiluðu þeir í þriðju deild og við unnum okkur upp í aðra deild og urðum svo Íslandsmeistarar innanhúss. Eftir það varð ég svo bara Íslandsmeistari með old boys.“

Fimm leikir, ekkert mark

Stefán Pálsson, sagnfræðingur, knattspyrnuáhugamaður og höfundur spurninga í Útsvari, kom af fjöllum þegar Vísir hafði samband við hann nú undir kvöld. Hann fletti Brynjari þó upp á meðan símtalinu stóð. „Já, það er rétt. Brynjar Níelsson árið 1982. Fimm leikir, ekkert mark.“

Er eitthvað um spjöld þarna?

„Nei, Brynjar myndi ekki deila við dómarann. Það eru engar líkur á því. Mér finnst hins vegar gleðilegt að sjá nýjar og óvæntar hliðar dúkka upp á Brynjari í hverri viku. Hann sló í gegn sem internetgrínisti í síðustu viku og nú sem íþróttakempa.“

Stefáni þykir leiðinlegt að hafa haft þessa fimm leiki af Brynjari. „Spurningin hefði náttúrulega verið enn betri ef ég hefði getað haft hann með. En svona er þetta.“

Facebook-færsla Brynjars frá því fyrr í kvöld:

Fékk af því fregnir að haldið hafi verið fram Í Útsvari að Höskuldur Þórhallsson hafi verið eini núverandi þingmaðurinn fyrir utan Bjarna Benediktsson og Willum Þór Þórsson sem hafi spilað í efstu deild í knattspyrnu. Þetta er rangt og spurningameistari Útsvars hefði mátt vita það að menn verða ekki eins hjólbeinóttir og ég nema að hafa spilað í efstu deild. Ég reikna með afsökunarbeiðni frá RUV enda hafa menn þar á bæ beðist afsökunar af ómerkilegri ástæðum. Svo skil ég ekki hvernig keppnisliðunum datt í hug nöfn þeirra Guðlaugs Þórs og Sigurðar Inga. Ég hefði frekar giskað á að þeir hefðu verið í ballett en spilað knattspyrnu í efstu deild.