Baðhúsið hefur samið um nýtingu gjafakorta

Baðhúsið hefur samið við fjögur fyrirtæki um innlausn gjafakortahafa Baðhússins. Í tilkynningu frá fyrirtækinu segir að Baðhúsið hafi samið við Sporthúsið, snyrtistofuna Bonita, hárstofuna Modus og Gentle giants hvalaskoðun á Húsavík.

„Baðhúsið vonar að þessir samningar nýtist handhöfum gjafakortanna og ítrekar enn vonbrigði sín með að rekstri Baðhússins hafi lokið í síðustu viku en reynt var til hins ýtrasta að semja við leigusalann Reginn með ýmsu móti í því skyni að halda rekstrinum áfram,“ segir í tilkynningunni.

Baðhúsið skoðar nú réttarstöðu sína gagnvart Reginn vegna málsins.

Linda Pétursdóttir, eigandi Baðhússins, hefur haldið því fram að vanefndir Regins varðandi afhendingu á húsnæðinu hafi valdið Baðhúsinu erfiðleikum. Því hafi rekstur Baðhússins ekki gengið upp.

Helgi Gunnarsson, forstjóri Regins, segir þó að fyrirtækið hafi staðið við samninga við Lindu.