Enski boltinn

Búinn að fara vel yfir þetta og spáir Liverpool titlinum

Óskar Ófeigur Jónsson skrifar
Sadio Mane hefur verið að gera góða hluti í framlínu Liverpool að undanföru og er búinn að taka upp hanskann fyrir Mo Salah.
Sadio Mane hefur verið að gera góða hluti í framlínu Liverpool að undanföru og er búinn að taka upp hanskann fyrir Mo Salah. Getty/Simon Stacpoole
Átta leikir eru eftir af ensku úrvalsdeildinni og því 24 stig eftir í pottinum. Manchester City er með eins stigs forskot á Liverpool en mikið á enn eftir að gerast.

Gary McAllister, fyrrum leikmaður Liverpool og Leeds, hefur farið vel yfir síðustu átta leiki Manchester City og Liverpool. Hann hefur reiknað út hvaða lið verður enskur meistari í vor.

Flestir spá því eflaust að Liverpool sé búið að klúðra tækifærinu sínu með því að missa niður tíu stiga forystu en það er ekki öll von út enn. Eitt stig er enginn munur og 24 stiga pottur bíður upp á margt.





McAllister spilaði í tvö tímabil með Liverpool og hefur auðvitað taugar til Anfield en hann sagði Sky Sports frá „útreikningum“ sínum.

„Ég hef skoðað vel leiki liðanna og hef spáð fyrir úrslitin í þeim. Ég hélt að ég myndi enda með Manchester City í fyrsta sætinu,“ sagði Gary McAllister við Sky Sports.

„Þegar ég tók stigin hins vegar saman þá endaði Liverpool á toppnum með einu stigi meira en City,“ sagði McAllister.

McAllister viðurkennir að það sé mikil pressa á Liverpool að enda 29 ára bið eftir enska meistaratitlinum en leggur áherslu á það að liðin verða bara að einbeita sér að einum leik í einu.

„Það er mikil pressa og hún fer ekkert fram hjá leikmönnunum þrátt fyrir að þeir segi annað. Það er mikill hávaði fyrir utan liðið vegna þess að Liverpool hefur ekki unnið titilinn svona lengi. Þeir verða bara að halda einbeitingunni á næsta leik og ekki horfa of langt,“ sagði McAllister.

Gary McAllister spilaði með Liverpool frá 2000 til 2002 en hann kom til félagsins 35 ára gamall eftir að hafa spilað lengstum með Leicester City (1985-1990) og Leeds United (1990-1996).

Liverpool var búið að bíða í áratug eftir enska meistaratitlinum þegar McAllister mætti á svæðið en hann vann bikarþrennuna með liðinu tímabilið 2000-01 eða enska bikarinn, enska deildabikarinn og UEFA-bikarinn. Liverpool vann alls fimm titla árið 2001.

McAllister hefur reyndar orðið oftar enskur meistari en Liverpool á síðustu 29 árum því hann vann ensku deildina með Leeds United tímabilið 1991-92.

Enski boltinn

Mest lesið


Fleiri fréttir

Sjá meira


×

Mest lesið