Innlent

Undirskriftasöfnun hafin gegn áfangaheimili

Magnús Már Guðmundsson skrifar
Jórunn Frímannsdóttir, borgarfulltrúi Sjálfstæðisflokksins, og formaður velferðarráðs Reykjavíkur.
Jórunn Frímannsdóttir, borgarfulltrúi Sjálfstæðisflokksins, og formaður velferðarráðs Reykjavíkur.

Hafin er undirskriftasöfnun í Norðlingaholti gegn fyrirhuguðu áfangaheimili sem stefnt er að hefji starfsemi í haust.

,,Ég er skelfingu lostin yfir þessari ákvörðun," segir Díana Fjölnisdóttir, íbúi í Hólmvaði, en fyrirhugað heimili verður í Hólavaði.

Díana gagnrýnir borgaryfirvöld fyrir að setja áfangaheimili í mitt íbúðarhverfi án þess að málið hafi farið í gegnum grenndarkynningu.

,,Það er allskonar óþveralýður sem fylgir þessu vesalings fólki," segir Díana og bætir við að sér þyki eðlilegra að starfsemi eins og þessi fari fram í dreifbýli þar sem fólk ,,geti andað að sér hreinu lofti."

Jórunn Frímannsdóttir, formaður velferðarráðs Reykjavíkur, segir að þjónustumiðstöð borgarinnar í hverfinu og Heilsuverndarstöðin muni kynna íbúum væntanlega starfsemi þegar samkomulag liggur fyrir.

,,Það er vont þegar heimili eins og þetta fara í umræðuna með þessum hætti áður en búið er að kynna þau fyrir íbúum í nágrenninu," segir Jórunn og bætir við að fyrirhugað heimili er ætlað einstaklingum sem lokið hafa meðferð og eru ákveðnir í að breyta lífi sínu.

Heilsuverndarstöðin mun sjá um rekstur heimilisins. Ákvörðun velferðarráðs Reykjavíkur að ganga til samninga við fyrirtækið hefur verið gagnrýnd af minnihlutanum í Reykjavík. Fjórir aðilar buðu í reksturinn þar á meðal SÁÁ. Tilboð samtakanna var lægra en tilboð Heilsuverndarstöðvarinnar.












Tengdar fréttir

Segir sviðsstjóra pólitíska aðstoðarkona

Þorleifur Gunnlaugsson, borgarfulltrúi VG, segir Jórunni Frímannsdóttir hafa fengið sviðsstjóra velferðarsviðs Reykjavíkur með sér í ,,pólitískan slag" en saman hafa þær skrifað greinar um búsetuúrræði með félagslegum stuðningi.

Eðlilega staðið að samningi um áfangaheimili

Innri endurskoðun Reykjavíkurborgar telur málefnalegar forsendur liggja að baki ákvörðun velferðarráðs að semja við Heilsuverndarstöðina/Alhjúkrun um áfangaheimili fyrir einstaklinga eftir meðferð.

Málaferli erfið leið fyrir SÁÁ

Ari Matthíasson framkvæmdastjóri SÁÁ segir að samtökin eigi mikið undir samstarfi við Reykjavíkurborg og ríkið sem kaupi ákveðna þjónustu af samtökunum. Af þeim sökum sé ,,erfitt að standa í stjórnsýslukærum gagnvart þessum aðilum."

,,Hún er ekki aðstoðarkona mín"

Jórunn Frímannsdóttir segir skrif Þorleifs Gunnlaugssonar um samvinnu hennar og sviðsstjóra velferðarsviðs vera sérstök. ,,Ég þekkti Stellu ekki persónulega áður en hún var ráðin. Hún er ekki aðstoðarkona mín," segir Jórunn.

Mest lesið


Fleiri fréttir

Sjá meira


×

Mest lesið