Dómarinn eyðilagði leikinn

Chris Coleman knattspyrnustjóri Fulham var æfur af reiði yfir frammistöðu dómarans Andre Marriner þegar liðið tapaði fyrir Wigan í ensku úrvalsdeildinni í dag. Wigan skoraði sigurmarkið þegar komið var fram í viðbótartíma.

Marriner dæmdi ekki vítaspyrnu sem Coleman taldi sína menn eiga að fá í fyrri hálfleik og til að gera daginn verri fyrir Fulham þá gerði Marriner ekkert í málunum þegar John Filan markvörður Wigan fékk boltann í höndina fyrir utan vítateig.

"Við höfðum algera yfirburði í fyrri hálfleik. Dómarinn tók nokkrar afar rangar ákvarðanir og ég þurfti að róa leikmenn mína niður. Við áttum skilið að fá eitthvað út úr þessum leik en það voru utanaðkomandi öfl sem sáu til þess að sú varð ekki raunin." sagði Coleman hundfúll yfir frammistöðu dómarans sem hann sagði að ætti að gleyma þessum degi sem fyrst.