Freista þess að komast til Nablus

"Það er óvíst að við komumst til Nablus vegna ástandsins sem hér ríkir," segir Margrét Scheving Thorsteinsson, ein sex íslenskra ungmenna sem stödd eru í Palestínu. Vaxandi spennu hefur gætt í samskiptum Ísraela og Palestínumanna Margrét var stödd í Jerúsalem þegar Fréttablaðið náði tali af henni í gær en til stendur að Íslendingarnir ferðist síðar í vikunni til borgarinnar Nablus á Vesturbakkanum þar sem þau ætla að taka þátt í alþjóðlegri æskulýðsráðstefnu. Arna Ösp Magnúsardóttir ætlaði að vera með í för, en henni var vísað úr landi eftir yfirheyrslur við komuna til Ísraels í fyrradag. Fjögur ungmennanna ætluðu að leggja af stað til Nablus nú í bítið. Anna Tómasdóttir, ein fjórmenninganna, var bjartsýn á að það tækist. "Við höfðum samband við einn skipuleggjenda ferðarinnar og skildist á henni að hún væri nú þegar búin að sjá fyrir því að við kæmumst til borgarinnar."