Gæludýraeigendur fái ný búsetuúrræði

„Við viljum reyna að koma til móts við þetta fólk og finna því nýjar íbúðir til að búa í þar sem má vera með gæludýr,“ segir Björn Magnússon framkvæmdastjóri Brynju, hússjóðs Öryrkjabandalagsins.

Á þriðjudag safnaðist fólk saman fyrir framan skrifstofur hússjóðsins í Hátúni til að mótmæla því að gæludýr eru ekki lengur leyfð í leiguíbúðum á vegum hússjóðsins. Margir tóku gæludýrin með sér og meðal þeirra mátti greina sorg og örvæntingu. 



Frá og með 15. maí síðastliðnum ákvað Brynja að byrja að framfylgja reglum sínum um almennt bann við gæludýrahaldi í íbúðum hússjóðsins sem og banni við heimsóknum gæludýra í íbúðirnar.

Á meðan íbúar íbúða á vegum hússjóðsins mótmæltu var haldinn stjórnarfundur hússjóðsins. Þar var tekin sú ákvörðun að víkja ekki frá því að framfylgja banninu en reyna að koma til móts við íbúa.

„Við þurfum að hugsa um alla okkar leigjendur og það hafa komið kvartanir vegna gæludýrahalds,“ segir Björn en vill ekki greina frá því hversu margar þær eru. „Ein kvörtun er nóg, þegar sá sem kvartar er með reglurnar í sínum höndum er lítið hægt að gera annað en að framfylgja þeim.“

Ákvörðun um að framfylgja banni hefur komið afar illa við íbúa hússins. Í viðtali við Stöð 2 á miðvikudag sagðist Hildur Hjálmarsdóttir hafa fengið taugaáfall þegar hún fékk bréf um ákvörðun hússjóðsins.

„Ég fékk taugaáfall þegar ég fékk bréfið og veikindin hafa versnað,“ sagði hún og sagðist ekki myndu una því að láta lítinn smáhund sinn frá sér. „Ef hann fer, þá fer ég líka.“

Íbúar hússins segja bannið vega að heilsu þeirra og velferð. Margir þeirra hafa myndað sterk tengsl við gæludýr sín og geta ekki hugsað sér líf án þeirra. Björn bendir á að hússjóðurinn eigi um 765 íbúðir víða og í búsetu þeirra sé alltaf velta. „Það eru alltaf einhverjar íbúðir að losna sem væri hægt að veita til þeirra sem eiga gæludýr. Þá höfum við verið að byggja raðhús og kaupa íbúðir sem henta til gæludýrahalds, lífsgæðin eru betri,“ segir hann og vísar þá bæði í hag íbúa og gæludýra.