Sveinn Aron og Ísak geta komist í þriggja ættliða klúbbinn

Ef þeir Sveinn Aron Guðjohnsen og Ísak Bergmann Jóhannesson koma við sögu í leik Íslands og Englands á Wembley í Þjóðadeildinni í kvöld feta þeir í fótspor feðra og afa sinna með því að leika með íslenska A-landsliðinu.

Sveinn Aron (22 ára) og Ísak (17 ára) voru meðal þeirra leikmanna úr U-21 árs landsliðinu sem voru kallaðir inn í A-landsliðið fyrir leikinn gegn Englandi í kvöld.

Ef þeir spila á Wembley í kvöld verða þeir fulltrúar þriðja ættliðarins í sínum fjölskyldum í A-landsliðinu í fótbolta.

Óhætt er að segja að þeir Sveinn Aron og Ísak séu af miklum fótboltaaðalsættum. Afi Sveins Arons, Arnór Guðjohnsen, lék 73 landsleiki á árunum 1979-97 og skoraði fjórtán mörk. Sonur Arnórs og faðir Sveins Arons, Eiður Smári, lék 88 landsleiki á árunum 1996-2016 og skoraði 26 mörk. Hann er markahæsti leikmaður í sögu íslenska landsliðsins ásamt Kolbeini Sigþórssyni.

Eiður Smári lék sinn fyrsta landsleik í 0-3 sigri á Eistlandi í apríl 1996 þegar hann kom inn á fyrir föður sinn. Þeir feðgar áttu að spila saman gegn Makedóníu á Laugardalsvellinum um sumarið en ekkert varð af því vegna alvarlegra meiðsla Eiðs Smára.

Jóhannes Karl Guðjónsson, faðir Ísaks, lék 34 landsleiki á árunum 2001-07 og skoraði eitt mark. Faðir hans og afi Ísaks, Guðjón Þórðarson, lék sinn eina landsleik gegn Færeyjum 1985.

Guðjón þjálfaði seinna íslenska landsliðið með frábærum árangri á árunum 1997-99. Elsti sonur hans, Þórður, var í lykilhlutverki í íslenska landsliðinu á þessum tíma og sá næstelsti, Bjarni, lék einnig nokkra landsleiki undir stjórn föður síns. Hálfbróðir þeirra Þórðar, Bjarna og Jóhannesar Karls, Björn Bergmann Sigurðarson, hefur leikið sautján landsleiki fyrir Íslands hönd.

Það hefur aðeins tvisvar sinnum gerst að þrír eða fleiri ættliðir í sömu fjölskyldunni leika með íslenskum A-landsliðum í fótbolta.

Þórhallur Hinriksson fetaði í fótspor afa síns, Þórhalls Einarssonar, og föðurs, Hinriks Þórhallssonar, þegar hann lék með landsliðinu í kringum aldamótin. Þórhallur Einarsson lék fyrsta landsleik Íslands gegn Danmörku 1946. Sonur hans, Hinrik, lék tvo landsleiki, annan 1976 og hinn 1980. Þórhallur Hinriksson lék svo fimm landsleiki á árunum 2000-01 og skoraði eitt mark.

Albert Guðmundsson, sem er í íslenska landsliðinu og gæti leikið gegn Englandi í kvöld, á langafa, afa, móður og föður sem hafa leikið A-landsleiki. 

Nafni hans, Albert Guðmundsson, var fyrsti atvinnumaður Íslands og lék sex landsleiki og skoraði tvö mörk. Sonur Alberts, Ingi Björn, lék fimmtán landsleiki og skoraði tvö mörk. Dóttir hans og móðir Alberts, Kristbjörg, lék fjóra landsleiki um miðjan 10. áratug síðustu aldar. Faðir Alberts, Guðmundur Benediktsson, lék svo tíu landsleiki og skoraði tvö mörk.

Í íslenska hópnum sem mætir Englandi eru alls sjö leikmenn sem eiga foreldra sem hafa leikið A-landsleiki í fótbolta: Rúnar Alex Rúnarson (Rúnar Kristinsson), Hólmar Örn Eyjólfsson (Eyjólfur Sverrirsson), Birkir Bjarnason (Bjarni Sveinbjörnsson), Arnór Sigurðsson (Margrét Ákadóttir), Ísak Bergmann Jóhannesson (Jóhannes Karl Guðjónsson), Albert Guðmundsson (Guðmundur Benediktsson og Kristbjörg Ingadóttir) og Sveinn Aron Guðjohnsen (Eiður Smári Guðjohnsen).

Leikur Íslands og Englands hefst klukkan 19:45 í kvöld og verður sýndur beint á Stöð 2 Sport 2.