Kári Árnason talaði skýrt og skorinort á blaðamannafundi Íslands í dag þegar hann var spurður út í framtíð gullkynslóðarinnar.

Kári Árnason verður fyrirliði íslenska landsliðsins á móti Englandi á morgun og leikurinn á Wembley gæti orðið síðasti landsleikurinn hans á ferlinum.

Kári var spurður út í það á blaðamannafundinum hvernig hann sér framtíð íslenska landsliðsins og þá sérstaklega þegar kemur að eldri leikmönnum liðsins.

Kári er enn að spila 38 ára gamall en það eru margir leikmenn liðsins sem eru komnir yfir þrítugsaldurinn og einhverjir hafa velt því fyrir sér hvort þeirra landsliðstími væri að líða undir lok.

Kári var því spurður út í umræðuna um að kominn sé tími á mikil kynslóðaskipti, og að kjarninn sem myndað hefur liðið sem náðu hefur á tvö stórmót sé að hverfa:

„Ég held að það sé best fyrir fréttamenn að reyna eins og þeir geta að grátbiðja þá um að halda áfram, því þetta er eina liðið sem hefur náð einhverjum árangri,“ sagði Kári.

„Þú spilar bara með þitt sterkasta lið. Tími ungra stráka kemur alltaf. Ég er að taka sjálfan mig út úr þessari mynd því ég er talsvert eldri. Þessir strákar eru bara um þrítugt,“ sagði Kári.

„Það er nóg eftir hjá þeim en þeir þurfa að haldast heilir. Menn eins og Jói, Alfreð og Kolli. Það þýðir ekki að tjasla sér bara saman og ná að spila einn leik. Ef að þeir haldast heilir þá eru þetta okkar bestu menn,“ sagði Kári Árnason.

Íslenska liðið mun spila alla undankeppni HM á næsta ári og næsta úrslitakeppni HM er síðan eftir tvö ár.