Aftur skoraði Guð­laugur Victor og nú í ó­trú­legum sigri

Guðlaugur Victor Pálsson virðist vera búinn að finna fram markaskóna í þýsku B-deildinni. Hann skoraði sitt annað mark í vikunni fyrir Darmstadt í dag.

Guðlaugur Victur hefur verið sjóðandi heitur eftir síðasta landsleikjahlé. Fyrir helgi skoraði hann eina mark Darmstadt í 1-1 jafntefli gegn Osnabruck og aftur skoraði hann í dag.

Darmstadt vann 4-3  sigur við Karlsruher á útivelli í dag. Guðlaugur Victor jafnaði metin á 65. mínútu fyrir Darmstadt og tólf mínútum síðar komust þeir yfir með marki Serdar Dursun.

Það var hins vegar átta mínútum fyrir leikslok er Philipp Hofmann jafnaði metin en dramatíkin var ekki úti. Darmstadt fékk vítaspyrnu á 94. mínútu og þar kom sigurmarkið.

Darmstadt er því með tíu stig eftir fyrstu sex leikina. Þeir sitja í 8. sæti deildarinnar.