Enski boltinn

Ungu strákarnir sem gætu þurft að redda málunum fyrir Klopp og Liverpool

Óskar Ófeigur Jónsson skrifar
Rhys Williams kom inn í Liverpool vörnina á móti Midtjylland á Anfield í gær. Hann er bara nítján ára gamall.
Rhys Williams kom inn í Liverpool vörnina á móti Midtjylland á Anfield í gær. Hann er bara nítján ára gamall. EPA-EFE/Michael Regan

Englandsmeistarar Liverpool eru að ganga í gegnum mikið mótlæti þessa dagana þegar hver lykilmaðurinn á fætur öðrum dettur út í meiðsli eða veikindi. Ástandið er sérstaklega bagalegt í miðvarðarstöðunni.

Lykilmaðurinn Virgil van Dijk sleit krossband á móti Everton og Joel Matip hefur heldur ekki spilað með liðinu síðan í þessum rándýra Everton leik þar sem Thiago Alcantara meiddist líka.

Enn eitt áfallið varð svo í gær þegar Brasilíumaðurinn Fabinho tognaði í Meistaradeildarleik á móti danska félaginu Midtjylland og þurfti að fara af velli eftir aðeins hálftíma leik. Klopp hafði fært hann af miðjunni niður í vörnina með góðum árangri en þarf nú að leita aðra leiða til að fylla í risastór skarð Virgil van Dijk.

Jürgen Klopp talaði um það eftir leikinn í gær að meiðsli Fabinho væri það síðasta sem liðið hans þurfti á að halda í þessum miðvarðarhallæri. Liverpool kaupir ekki nýjan miðvörð fyrr en í fyrsta lagi í janúar og það eru margir mikilvægir leikir framundan.

Klopp gæti því þurft að treysta á ungu miðverðina í hópnum en það eru fjórir ungir og efnilegir miðverðir í leikmannahópi Liverpool. Þetta eru þeir Rhys Williams, Sepp van den Berg, Nathaniel Phillips og Billy Koumetio.

Það var einmitt Rhys Williams sem kom inn fyrir Fabinho í leiknum á móti Midtjylland í gær.

Sky Sports skoðaði nánar þessa fjóra ungu miðverði sem gætu fengið mikla ábyrgð á næstunni.

Hinn nítján ára gamli Rhys Williams lék sinn fyrsta Liverpool leik í september og hefur tekið þátt í nokkrum leikjum á leiktíðinni. Hann var í sigurliði Liverpool í unglingabikarnum árið 2019 og skrifaði undir fimm ára samning fyrr á þessu ári.

Rhys Williams hefur talað um það sjálfur að hafa verið að fylgjast vel með Van Dijk til að læra af honum. Williams er á uppleið, hefur fengið tækifærið með aðalliði Liverpool og komst í enska 21 árs landsliðið á dögunum.

Sepp van den Berg er átján ára gamall Hollendingur sem Liverpool keypti í fyrrasumar. Hann spilaði samt bara fjóra leiki í fyrrasumar. Þegar Van den Berg kom til Liverpool þá átti Bayern Münhcen einnig að hafa haft áhuga á hinum.

Sepp van den Berg spilaði 22 leiki með PEC Zwolle í hollensku úrvalsdeildinni áður en hann kom til Liverpool. Hann virðist þó vera á eftir Rhys Williams í goggunarröðinni.

Það leit út fyrir að hinn 23 ára gamli Nathaniel Phillips væri á leið á lán á dögunum því Middlesbrough, Nottingham Forest og Swansea höfðu öll áhuga á honum. Liverpool ákvað hins vegar að lána hann ekki því liðið þurfti á mönnum að halda sem gætu leyst miðvarðarstöðuna.

Phillips var á láni hjá Stuttgart í þýsku b-deildinni í fyrra en Jürgen Klopp kallaði hann til baka í desember þegar Joel Matip, Dejan Lovren og Fabinho meiddust allir á sama tíma. Stuttgart fékk hann þó aftur í janúar. Phillips er ekki í Meistaradeildarhóp Liverpool.

Billy Koumetio er aðeins sautján ára gamall en það fer ekkert framhjá neinum að það eru margir spenntir fyrir framtíðinni hjá þessum efnilega Frakka. Koumetio skrifaði undir sinn fyrsta atvinnumannasamning í ágúst og stóð sig vel með Liverpool liðinu á undirbúningstímabilinu.

Koumetio lenti hins vegar í miklum vandræðum í æfingaleik á móti Blackpool skömmu fyrir tímabil og var tekinn af velli í hálfleik. Billy Koumetio er líklega of ungur til að leysa vandræði Liverpool á þessu tímabili en er nafn sem stuðningsmenn Liverpool þurfa að leggja á minnið.

Hér má sjá alla umfjöllun Sky Sports um ungu strákana sem gætu leyst miðvarðarstöðuna hjá Liverpool.


Tengdar fréttir



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.