Man Utd var ekki tilbúið að borga svo hann fór til Dortmund

Jude Bellingham – ungstirnið sem gerði garðinn frægan með Birmingham City í ensku B-deildinni í vetur – valdi Borussia Dortmund fram yfir Manchester United. Bæði lið vildu fá hann í sínar raðir eftir að ensku B-deildinni lauk.

Fór það svo að Bellingham valdi Dortmund en enskir leikmenn virðast vinsælir þar í landi þessa dagana. Eflaust fær miðjumaðurinn Bellingham að spila meira hjá Dortmund enda miðja Man United vel mönnuð og leikmaðurinn tiltölulega nýorðinn 17 ára gamall.

Þá greinir íþróttavefurinn ESPN frá því að Man Utd hafi ekki boðið Bellingham jafn há laun og Dortmund gerði. United var þó tilbúið að greiða sömu upphæð og þýska félagið en alls gæti Dortmund greitt tæplega 23 milljónir punda fyrir leikmanninn.

Bellingham ku hafa verið nálægt því að ganga til liðs við Man United í janúarglugganum en á endanum lagði félagið meiri áherslu á að fá Bruno Fernandes í sínar raðir. Það reyndist ágætis ákvörðun.

Solskjær sá fyrir sér að Bellingham myndi spila allavega 20 leiki fyrir United á næstu leiktíð en Ed Woodward og Glazer-fjölskyldan, eigendur félagsins, voru ekki tilbúin að setja slíkan pening í leikmann sem á aðeins að baki eitt tímabil með aðalliði – og það í B-deildinni.

Eigendurnir eru brenndir eftir samninginn sem Alexis Sanchez fékk hjá félaginu. Hann er nú á leið til Inter Milan eftir hörmulegan tíma á Old Trafford.