Árni Vill kom inn af bekknum og tryggði sigur á Dynamo Kiev

Íslenski knattspyrnumaðurinn Árni Vilhjálmsson hóf leik á varamannabekk Kolos Kovalivka þegar liðið fékk stórlið Dynamo Kiev í heimsókn í úkraínsku úrvalsdeildinni í dag.

Árni kom inn af bekknum á 64.mínútu en skömmu áður höfðu heimamenn komist í forystu. Árni hafði verið inn á vellinum í sjö mínútur þegar Kolos fékk vítaspyrnu.

Árni steig á vítapunktinn og skoraði það sem reyndist síðasta mark leiksins. Lokatölur 2-0 fyrir Kolos sem verða að teljast óvænt úrslit þar sem Dynamo er í 2.sæti deildarinnar á meðan Kolos er í því sjötta, sem er jafnframt neðsta sætið í efra umspili deildarinnar.

Shakhtar Donetsk í algjörri yfirburðastöðu á toppi deildarinnar með 23 stiga forystu á Dynamo Kiev.