Forsvarsmenn tónlistarhátíðarinnar Aldrei fór ég suður ætla ekki að aflýsa hátíðinni í ár þrátt fyrir heimsfaraldur kórónuveirunnar. Hátíðin, sem haldin hefur verið undanfarin ár á Ísafirði, verður þó með breyttu sniði vegna samkomubanns sem lagt hefur verið á landsmenn. Bannað verður að mæta á hátíðina.

Kristján Freyr Halldórsson, rokkstjóri hátíðarinnar segir viðbrögðin við nýju fyrirkomulagi hafa mælst vel fyrir hjá þeim tónlistarmönnum sem boðað höfðu komu sína.

„Flest atriðin sem við höfðum bókað á hátíðina tóku afskaplega vel í þetta erindi, að reyna að halda tempóinu og gera tónleikadagskrá sem við myndum skila af okkur inn í stofu landsmanna. En þetta verður bara einn dagur í stað tveggja eins og við höfum haft þetta síðustu árin. sagði Kristján.

Sjá einnig: Aldrei fleiri á Aldrei fór ég suður

Aldrei fór ég suður verður því haldin laugardaginn 11. apríl, án áhorfenda. Tónleikastaðir verða tveir, annars vegar vestur á Ísafirði og hins vegar í Reykjavík og verður öllum herlegheitunum streymt heim í stofu, landsmönnum að kostnaðarlausu.

„Við munum streyma þessu, að kostnaðarlausu, á netinu. Við urðum að taka ákvörðun þar sem að það er svo mikið spurt og mikið af skilaboðum og þess vegna sendum við út þessa yfirlýsingu um að við ætlum að halda okkar striki. Nánari útlistun á framkvæmdinni verður bara kynnt þegar kemur að henni, en þetta er uppleggið,“ sagði Kristján.

Kristján segir að vegna breytinganna muni hvert atriði spila skemur en ef hægt yrði að halda hátíðina í óbreyttri mynd. „Í stað þess að vera að færa til ákváðum við að gera þetta svona,“ sagði Kristján rokkstjóri Aldrei fór ég suður.