Gylfi: Hlakka mikið til laugardagsins

Gylfi Sigurðsson leikur sinn fyrsta leik fyrir Swansea City á Liberty Stadium í rúm tvö ár þegar Svanirnir taka á móti Villareal í vináttuleik á laugardaginn kemur.

Í samtali á heimasíðu Swansea segist Gylfi vera spenntur að spila fyrir framan stuðningsmenn Swansea á nýjan leik, en sem kunnugt er lék hann sem lánsmaður hjá velska liðinu seinni hluta tímabilsins 2011-2012.

„Það er liðinn langur tími síðan ég spilaði í treyju Swansea á Liberty Stadium, svo ég hlakka mikið til laugardagsins,“ sagði íslenski landsliðsmaðurinn og bætti við:

„Ég naut þess að vera hér á láni og ég á góðar minningar frá leikjum sem ég hef spilað á Liberty. Ég man að stuðningsmennirnir voru alltaf syngjandi og duglegir að styðja við bakið á leikmönnunum sem er svo mikilvægt fyrir liðið.

„Þetta var líka svona þegar ég spilaði hér með Tottenham - stuðningsmennirnir studdu liðið hvernig sem staðan var, og stuðningurinn verður aftur mikilvægur á þessari leiktíð,“ sagði Gylfi, en leikurinn gegn Villareal er síðasti leikur Swansea á undirbúningstímabilinu.

Swansea heimsækir Manchester United í opnunarleik ensku úrvalsdeildarinnar laugardaginn 16. ágúst.