Hann var alltof ungur

Leikaraparið Goldie Hawn og Kurt Russell er búið að vera saman í 29 ár en Goldie fannst hann fullungur þegar þau hittust fyrst.

Goldie, sem í dag er 66 ára, hitti Kurt fyrst þegar hún var 21 árs og hann aðeins sextán ára gamall. Neistar flugu á setti kvikmyndarinnar The One and Only, Genuine, Original Family Band árið 1968 en Goldie vildi ekki byrja með honum þá því henni fannst hann alltof ungur fyrir sig. Það var ekki fyrr en þau léku saman í Swing Shift árið 1983 að rómantíkin byrjaði fyrir alvöru. Þetta segir Goldie í útvarpsviðtali við Desert Island Discs.

"Ég var 21 árs og hann sextán og mér fannst hann yndislegur en alltof ungur. Árum seinna hittumst við aftur og mér líkaði vel við hann og ég mundi að mér líkaði mjög vel við hann þegar við hittumst fyrst. En við sögðum bæði að við myndum aldrei deita aðra leikara þannig að maður veit aldrei."

Goldie á tvö börn, Kate og Oliver, úr fyrra hjónabandi með Bill Hudson. Goldie og Kurt hafa aldrei gengið í hjónaband en þau eiga soninn Wyatt saman sem er 26 ára.

En hvað er leyndarmálið á bak við langlíft samband?

"Við höfum verið saman í 29 ár og ég held að ef fólk vill að hlutir gangi þá lætur það þá ganga en ef það vill það ekki þá fer allt til fjandans. Ég veit ekki hvort þetta hefur verið hörkuvinna en þetta er það sem ég vildi út úr lífinu – gott samband og heilbrigð fjölskylda."