Árni Þór þurfti að hætta keppni eftir tæplega 37 kílómetra

Árni Þór Árnason sundkappi þurfti að hætta sundi yfir Ermarsundið nú fyrir stundu. Á heimasíðu hans segir að axlarmeiðsl og miklir straumar þvingi hann til að taka þessa ákvörðun i samráði við skipstjórann og aðstoðarmenn sína um borð. Árni var búinn að synda í nákvæmlega 9 klukkutíma og 33 mínútur og lagt að baki 36,5 kílómetra.

Hann var að öðru leyti í mjög góðu ásigkomulagi þegar hann kom um borð og vildi hann skila þakklæti til allra sem hafa fylgst með veitt sér stuðning í verkefninu. Þetta var fyrsta tilraun Árna til að synda Ermarsundið en einungis einum Íslendingi hefur tekist að synda yfir sundið. Það gerði Benedikt Hjartarson árið 2008.

Heimasíða Árna Þórs.