Dýralæknar vanir ferðamenn

"Dýralæknar eru vanir ferðamenn og hafa ekki kveinkað sér undan því hingað til að keyra heiðarnar á Íslandi," segir Guðni Ágústsson um gagnrýni starfsmanna Yfirdýralæknis á staðsetningu Landbúnaðarstofnunar á Selfossi. "Þetta er búið og gert og ég er sannfærður um að Selfoss er heppilegur staður fyrir stofnunina." Guðni segist hafa fundað með dýralæknum vegna bréfsins í lok júní. "Ég lýsti vonbrigðum mínum með bréfið, sem kom fram of seint." Guðni segir að þá hafi legið fyrir ákvörðun Alþingis frá því um vorið um að stofnunin yrði ekki á stórhöfuðborgarsvæðinu. "Ég hvatti þá líka með kurteislegum hætti að draga bréfið til baka og birta það ekki og benti þeim að þeir væru væntanlegir starfsmenn stofnunarinnar og bæri að taka þátt í því að byggja hana upp." Guðni sagðist heldur ekki skilja tímasetninguna á bréfinu, en það var sent fjölmiðlum mánuði eftir að það var skrifað sama daginn og forstjóri stofnunarinnar var skipaður.