Kona stjórnandi í arabalandi

Íslenskur hjúkrunarfræðingur, Kolbrún Kristjánsdóttir, stjórnar daglegri starfsemi á stærsta sjúkrahúsi Sameinuðu arabísku furstadæmanna þegar hún er á vakt. Hún tók þátt í að koma sjúkrahúsinu á laggirnar árið 2000 og hefur nýlega undirritað ráðningarsamning til 2007. "Aðstæður í heilbrigðismálum eru ekki mjög góðar en þó eru þeir stöðugt að bæta ástandið. Það er langt í land ennþá því að það er mikið af einkasjúkrahúsum sem eru rekin af til dæmis Indverjum og þjónustan þar ekki nógu góð en þetta er allt á rétti leið," segir Kolbrún. Kolbrún segir að það sé ekki auðvelt að starfa sem stjórnandi í arabalandi en í Sameinuðu arabísku furstadæmunum sé ástandið betra en víða annars staðar. Arabar séu ekki vanir að vinna með vestrænum kvenkyns stjórnendum og auðvitað verði árekstrar. "Maður þarf að sanna sig. Arabarnir líta mann hornauga fyrst en maður þarf bara að vinna traust þeirra og sýna að maður valdi starfinu. Þá kemur þetta," segir hún.