Úttekt gerð á Íbúðalánasjóði

Félagsmálanefnd Alþingis hefur falið Ríkisendurskoðun að gera stjórnsýsluúttekt á Íbúðalánasjóði. Lánasýslu ríkisins og félagsmálaráðuneytið greinir á um hvort lánasamningar bankanna og Íbúðalánasjóðs séu ríkistryggðir. Fundur hófst í nefndinni klukkan hálfníu í morgun að kröfu Jóhönnu Sigurðardóttur Samfylkingu. Meðal þeirra sem voru kallaðir fyrir voru forsvarsmenn Íbúðalánasjóðs, félagsmálaráðuneytisins, Fjármálaeftirlitsins, Lánasýslu ríkisins, Sambands banka og sparisjóða og Samtaka atvinnulífsins. Á fundinum kom m.a. fram að Fjármálaeftirlitið skrifaði félagsmálaráðuneytinu undir lok júní og taldi þá fulla þörf á því að kanna hvort lánasamningar bankanna og Íbúðalánasjóðs samræmdust lögum. Á fundinum dró eftirlitið hins vegar í land. Þá kom einnig fram á fundinum að ágreiningur er milli Lánasýslu ríkisins sem fer með ríkisábyrgðir og félagsmálaráðuneytisins um hvort lánin til bankanna séu með ríkisábyrgð. Fundurinn stóð í rúmar fimm klukkustundir. Jóhanna Sigurðardóttir sagði að sér fyndist standa upp úr að fundinum loknum að Íbúðalánasjóður hefði mjög veika lagastoð gagnvart lánasamningunum. Það kom m.a. fram í máli fulltrúa Samtaka banka og sparisjóða. Jóhönnu finnst sjóðurinn einnig hafa tekið verulega áhættu því hann þurfi að standa undir kostnaði ef lántakendur standi ekki í skilum. Bankarnir hafi hins vegar tryggt sig með belti og axlaböndum og beri enga áhættu. Niðurstaða fundarins var að Ríkisendurskoðun myndi gera stjórnsýsluúttekt. Nefndin fékk lánasamningana í hendur og að fundi loknum fengu fréttamenn einnig afrit þar sem þó var búið að stroka yfir vaxtaprósentuna. Forsvarsmenn Íbúðalánasjóðs telja að þeir myndu tapa fjögur hundruð milljónum á ári ef þeir hefðu lagt áttatíu milljarðana sem þeir hafa lánað bönkunum inn í Seðlabankann. Eins og Stöð 2 hefur greint frá er lánað allt að tuttugu og fimm milljónir, eða áttatíu prósent af markaðsvirði, þar sem Íbúðalánasjóður tekur á sig alla áhættu ef eignir hrökkva ekki fyrir skuldum. Siv Friðleifsdóttir, formaður félagsmálanefndar, segist eiga mjög erfitt með að fullyrða hvort samningarnir séu á veikum lagalegum grunni. Þau sjónarmið hafi hins vegar komið fram í nefndinni og vegna þessa sé eðlilegt að Ríkisendurskoðandi skoði málið. Hann skoðar þá líka allt lagaumhverfið sem Íbúðalánasjóður vinnur eftir. Siv segir að sjóðurinn þurfi að ávaxta það fé sem komi inn þannig að þeir séu að reyna að gera þetta með sem eðlilegustum hætti.