Pólverjunum meinað að tjá sig

Pólsku verkamennirnir fimm sem starfa fyrir fyrirtækið Sputnikbátar á Akranesi hefur verið bannað af leigumiðluninni í Póllandi að tjá sig um launamál sín að sögn Vilhjálms Birgissonar formanns Verkalýðsfélags Akraness. Skúli Thorodsen framkvæmdastjóri Starfsgreinasambands Íslands segir að þeim hafi einnig verið bannað að kynna sér rétt sinn á Íslandi hjá hérlendum verkalýðsfélögum. "Við höfum ekki bannað þeim neitt og ég veit ekkert um það hvað þeirra vinnuveitendur í Póllandi hafa gert, það kemur okkur einfaldlega ekki við," segir Ingólfur Árnason einn af eigendunum Sputnikbáta. Vilhjálmur fékk þær upplýsingar hjá samstarfsmönnum pólverjanna að þeir fimmmenningar hefðu sjötíu og sjö þúsund krónur á mánuði hver en í samningi þeirra er kveðið á um að þeir vinni að minnsta kosti tíu klukkustundir á dag en Vilhjálmur fór á vinnustað þeirra eftir að Verkalýðsfélaginu hafði borist beiðni um að kanna fyrirtækið vegna gruns um að þar störfuðu erlendir verkamenn án atvinnuleyfis. Vilhjálmur hefur nú lagt inn kæru til sýslumannsins á Akranesi. Sveinn Andri Sveinsson, lögmaður fyrirtækisins, segir að löglega hafi verið að samningunum staðið og að þar séu íslenskir kjarasamningar virtir. Hvorki hann né Ingólfur gáfu upp hversu mikið greitt var fyrir verkamennina fimm en Vilhjálmur sagði í viðtali í morgunþætti á Talstöðinni í gær að Sputnikbátar hefðu greitt 2,1milljónir fyrir þriggja mánaða störf þeirra en það nemur 140 þúsundum fyrir hvern verkamann á mánuði sem er nokkuð undir lágmarkslaunum. Öllu minni upphæð kæmi þó í hlut verkamannanna því þóknun leigumiðlunarinnar er innifalin. Að sögn Vilhjálms barst verkalýðsfélaginu svo samskonar beiðni í gær um að annað fyrirtæki yrði kannað með sama hætti og er það mál nú í athugun. Ingólfur hvatti Vilhjálm í morgunþætti Talstöðvarinnar í gær til að kanna sem flest fyrirtæki og gaf það sterklega í skyn að mjög víða væri starfsmannahaldi fyrirtækja háttað með þessum hætti.