Góð kjörsókn í Suður Karólínu

Kjörsókn í forkosningum demókrata í Suður Karólínu hefur verið góð í dag og spá sumir metþáttöku. Barack Obama hefur verið efstur í flestum könnunum og er búist við því að hann fari auðveldlega með sigur af hólmi. Þetta eru síðustu forkosningar demókrata fyrir „Super Tuesday" eftir tíu daga en þá munu 20 ríki halda forskosningar. Repúblikanar hafa þegar haldið sínar forkosningar í Suður Karólínu og hafa þeir þeir þegar snúið athygli sinni að Flórída en þar verður kosið á þriðjudaginn kemur.

Kjörstöðum verður lokað á miðnætti að íslenskum tíma.

Til marks um yfirburði Obama í Suður Karólínu benda menn á þá staðreynd að hans aðal keppinautur Hillary Clinton hefur varið hluta vikunnar í kosningabaráttu í öðrum ríkjum sem þykir benda til þess að hún hafi gefið vonir um sigur upp á bátinn. Um helmingur demókrata í ríkinu eru blökkumenn og er talið að Obama njóti yfirgnæfandi stuðnings á meðal þeirra. Þegar við það bætist að John Edwards, annar frambjóðandi demókrata, er ættaður úr ríkinu og hann sigraði þar árið 2004 er ekki von á góðu hjá Hillary.

Þó bættist Hillary liðsauki á dögunum í baráttunni þegar stórblaðið The New York Times lýsti yfir stuðningi við hana. Í leiðara blaðsins var stuðningurinn sagður tilkominn vegna þeirrar yfirburðarþekkingar sem hún hafi yfir að ráða auk þess sem gáfur hennar og reynsla muni nýtast vel í starfi hennar nái hún kjöri.