Ísraelar spila alvöru Football Manager

Getur lið náð árangri með 8,000 þjálfara? Þessari spurningu verður fljótlega svarað í Ísrael þar sem hugmyndin á bak við tölvuleikinn Football Manager hefur nú verið færð í áþreifanlegan búning.

Aðeins rúmlega 100 manns mættu til að fylgjast með leik Hapoel Kiryat Shalom spila sinn fyrsta leik á tímabilinu í síðustu viku, en þó voru rúmlega 10,000 manns sem fylgdust með leiknum - og þorri þeirra var að þjálfa liðið.

Hugmynd þessi varð til á HM í fyrra þar sem fjöldi manna var ósáttur við þjálfara Argentínu að leyfa Leo Messi ekki að vera í byrjunarliðinu fyrir leik gegn Þjóðverjum.

Það er vefsíðan Web2Sport.com sem byrjaði með þessa skemmtilegu hugmynd, þar sem fólk getur farið á netið og gerst þjálfarar hjá liði Shalom - ekki ósvipað og í tölvuleiknum vinsæla Football Manager.

Sérstakur þjálfari var fenginn til að stýra æfingum hjá liðinu en þar fyrir utan eru það þjálfararnir heima í stofu sem ráða því hvernig liðið spilar og hvernig því er stillt upp. Það gera þátttakendur í tölvunni heima - alveg eins og í tölvuleiknum.

Á leikdag sitja menn svo heima og horfa á beina útsendingu frá leikjum liðsins á netinu þar sem alvöru knattspyrnumenn spreyta sig í alvöru leik.

Kryat tapaði fyrsta leiknum sínum 3-2. "Flestir leikmanna liðsins eru mjög ánægðir með þetta, því þetta vekur svo mikla athygli. Einn leikmanna liðsins, sem er fertugur og hefur leikið með því mjög lengi, var þó ekki sérstaklega ánægður því hann var kosinn út úr liðinu," sagði Moshe Hogeg, yfirmaður netsíðunnar.

Hann segir hugmyndina mælast mjög vel fyrir í Ísrael og hyggur á frekari útrás hugmyndarinnar á Englandi á næsta tímabili.

"Fjárfestar okkar ætla að gera svipaða hliti á Englandi á næsta keppnistímabili og vonir standa til um að þar verðum við með lið sem er ofar en í sjöttu deild," sagði Hogeg, en þar mun fyrirtækið væntanlega mæta harðri samkeppni frá ensku fyrirtæki - moneyfootballclub.com - sem þegar hefur verið komið á laggirnar þar í landi.

Þegar hafa yfir 53,000 manns skráð sig til leiks þar og vonir standa til um að hægt verði að rukka hvern þeirra um 35 pund til að reka félagið. Félög eins og Halifax, sem er í miklum rekstrarerfiðleikum, hafa þegar átt í viðræðum við fyrirtækið.